კონფლიქტებისა და მოლაპარაკებების საერთაშორისო კვლევითი ცენტრის ხელმძღვანელი, კონფლიქტოლოგი გოგი ხუციშვილი მიიჩნევს, რომ რუსეთს სააკაშვილის ხელისუფლებასთან ურთიერთობა უფრო აწყობდა, ვიდრე დღევანდელ მთავრობასთან.    

რუსეთ-საქართველოს ურთიერთობები და კონფლიქტურ რეგიონებთან დაკავშირებული სტრატეგია ექსპერტმა დღეს „პრაიმტაიმის“ პრესკლუბში შეაფასა.

ხუციშვილი აცხადებს, რომ აგვისტოს ომის შემდეგ, რუსეთმა თავის გეოპოლიტიკურ მიზნებს მიაღწია და ახლა ამ სტატუსკვოს გადახედვა აღარ აწყობს.

„სააკაშვილის და მისი ტელევიზიების პროპაგანდა მდგომარეობდა იმაში, რომ „ქართული ოცნება“ რუსული გეგმის ნაწილია და მოსახლეობამ მას ხმა არ უნდა მისცეს. ოქტომბრის არჩევნები მეტყველებს, რომ ეს ლეგენდა დაინგრა, ვინაიდან რუსეთს სააკაშვილის მთავრობასთან ურთიერთობა უფრო აწყობდა და არა ის ვითარება, რაც დღეს საქართველოშია. ახალი ვითარება დინამიკასთანაა დაკავშირებული - ჩვენ გვაწყობს აგვისტოს სტატუკვოს შეცვლა. რუსეთს კი - არა“ - განმარტა ხუციშვილმა.

ექსპერტი სწორედ ამას უკავშირებს საქართველოში ჩატარებული არჩევნების შემდეგ, რუსეთის საგარეო საქმეთა მინისტრის სერგეი ლავროვის განცხადებას.

„თავის პირველივე გამოსვლაში ლავროვმა წამოაყენა პირობა, რომ საქართველომ ჯერ აფხაზეთის და სამხრეთ ოსეთის დამოუკიდებლობა სცნოს და რუსეთი მხოლოდ ამის შემდეგ გადაწყვეტს დაამყაროს თუ არა ჩვენთან კონტაქტი და აღადგინოს დიპლომატიური ურთიერთობა. ეს იყო გაფრთხილება და პროცესის გარკვეულ ჩარჩოებში მოქცევა“ - აღნიშნა ექსპერტმა და დასძინა, რომ რუსეთი ყველანაირად ხაზს უსვამს, რომ საქართველოს როგორც პარტნიორს ან ოპონენტს, არ აღიარებს.

ხუციშვილის თქმით, სინამდვილეში, საქართველო კავკასიის რეგიონში მნიშვნელოვანი ქვეყანაა და მისი მნიშვნელობა ოქტომბრის არჩევნების შემდეგ კიდევ უფრო გაიზარდა.

იგი მიიჩნევს, რომ საქართველომ ინიციატივა უნდა გამოიჩინოს და რუსეთს წინადადებათა პაკეტით მიმართოს, რომელშიც მისი ინიციატივები დიპლომატიური ენით ჩამოყალიბდება, ხოლო ტერმინები ისე შეირჩევა, რომ არც ქვეყნის ინტერესები დაზიანდეს და არც გამაღიზიანებელი იყოს.

რაც შეეხება უსაფრთხოების თემას ხუციშვილი მიიჩნევს, რომ საქართველოს მხრიდან შესაძლებელია უსაფრთხოების გარანტიების გაცემა და გარკვეულ დოკუმენტებზე ხელის მოწერა. რაც მისი თქმით, ჟენევაში უკვე დაწყებულია.

„აქ არის ორი მომენტი, პირველი - გვინდა გავხსნათ საზღვრები და ვივაჭროთ აფხაზებთან და ოსებთან და მეორე - არ ვაპირებთ მათ ძალით შეთრევას ჩვენს სამართლებივ სივრცეში, როდესაც ამას სააკაშვილი ამბობდა ისინი პასუხობდნენ, რომ არ სჯერათ. ამ ხელისუფლების პირობებში კი, შეიძლება დაიჯერონ“ - განაცხადა ხუციშვილმა და დასძინა, რომ ხელისუფლებაში ისეთი ადამიანის ყოფნა როგორიც პაატა ზაქარეიშვილია, მათ ამის საფუძველს აძლევს.