პრემიერ-მინისტრობის კანდიდატმა ბიძინა ივანიშვილმა დღეს საპარლამენტო უმცირესობას ახალ - სიცრუისა და ძალადობისგან თავისუფალ რეალობაში კონსტრუქციული მუშაობა შესთავაზა.

„მიუხედავად იმისა, რომ დიდი სხვაობა არსებობს შეხედულებებსა და პოზიციებში, ჩვენი მზაობაა, რომ მაქსიმალურად მოგეცეთ პოზიციის დაფიქსირების შესაძლებლობა, მაგრამ თქვენი გადასაწყვეტია შეიცვალოთ და ახალ რეალობაში მოახერხოთ მუშაობა, ახალ რეალობაში, რომელშიც დასრულებულია სიცრუისა და ძალადობის ეტაპი“ - განაცხადა ივანიშვილმა.

უმცირესობის წევრების კითხვების პირველი ნაწილი შეეხებოდა პენსიების ზრდის, საყოველთაო სამედიცინო დაზღვევის, კახეთში სტიქიით დაზარალებული მოსახლეობის დახმარების უზრუნველყოფის წყაროებსა და სამუშაო ადგილების შექმნას.

როგორც ივანიშვილმა განაცხადა, მისთვის დღემდე უცნობია სახელმწიფო ბიუჯეტის რეალური შესაძლებლობები და ამიტომ აუცილებელია ბიუჯეტის საფუძვლიანი ანალიზი.

მისი თქმით, იმ შემთხვევაში თუ აღებული ვალდებულებების შესრულების საბიუჯეტი შესაძლებლობა არ იქნება, მაშინ ის გამოძებნის კანონიერ გზას და დამატებით წყაროებს, საჭირო ხარჯების გასაწევად.

„თქვენ შესაძლოა, არ იცით, მაგრამ პირველ ორ წელზე მეტ ხანს ვახერხებდი პარლამენტის წევრების, მინისტრების ხელფასებით უზრუნველყოფასა და თავდაცვის სამინისტროს დახმარებას აბსოლუტურად კანონიერი გზით და თუ ამის საჭიროება დადგება იგივე სათადარიგო გეგმა გამოიძებნება“ - განაცხადა ივანიშვილმა.

მისი თქმით, პენსიის 220 ლარამდე გაზრდა, რა თქმა უნდა, მოსვლისთანავე ვერ მოხერხდება, თუმცა, მისივე თქმით, ეს არის უახლოესი მომავლის გეგმა.

ამასთან, ივანიშვილი იმედოვნებს, რომ ქვეყანაში ძალიან მაღალი ტემპებით განხორციელდება უცხოური ინვესტიციების შემოდინება, რაც რეალური სამუშაო ადგილების შექმნის საფუძველი იქნება.

„ჩვენ უმოკლეს დროში ინვესტორები უნდა დავარწმუნოთ, რომ საქართველო პოლიტიკურად სტაბილური ქვეყანაა და ის ელიტური კორუფცია, რომელიც არსებული ხელისუფლების პირობებში იყო, ამოიკვთა“ - განაცხადა ივანიშვილმა.