საპარლამენტო კომიტეტებში იუსტიციის მინისტრობის კანდიდატის თეა წულუკიანის მოსმენა ხმაურის ფონზე მიმდინარეობს.

იურიდიულ საკითხთა და ადამიანის უფლებათა დაცვისა და სამოქალაქო კომიტეტების გაერთიანებულ სხდომაზე, წულუკიანმა დეპუტატებს პრიორიტეტები გააცნო. აღნიშნულის შემდეგ, საპარლამენტო უმცირესობის წევრებმა მინისტრობის კანდიდატის მისამართით კითხვები დასვეს, რომლის ფორმულირებაც უმრავლესობის წევრებმა გააპროტესტეს.

სხდომაზე სიტყვიერი კამათი დეპუტატებს აკაკი ბობოხიძესა და ზაზა პაპუაშვილს შორის მოხდა, რომლის დროსაც ბობოხიძემ ოპონენტებს მოუწოდა „დემოკრატობანას თამაშს მოეშვან“.

„უმცირესობას კითხვის დასმის ფორმულირებას ნუ გვასწავლით. ტონს ნუ გაამკაცრებთ, დემოკრატიის თამაშს მოეშვით. კითხვის დასმის სტილს კი ჩვენ გადავწყვეტთ“ - მიმართა უმრავლესობას ბობოხიძემ. 

ბობოხიძისა და პაპუაშვილის კამათში თინა ხიდაშელი ჩაერთო და ბობოხიძეს ზრდილობა დაუწუნა. „თქვენი ზრდილობა ვიცით“ - მიმართა ხიდაშელმა ბობოხიძეს.