ნატო-ს გენერალური მდივნის სპეციალური წარმომადგენელი სამხრეთ კავკასიასა და ცენტრალურ აზიაში ჯეიმს აპატურაი დარწმუნებულია, რომ საქართველოს პრემიერ-მინისტრობის კანდიდატი ბიძინა ივანიშვილი მზადაა ნატო-სთან ურთიერთობის საკითხი წინ წაწიოს. ამის შესახებ მან „ამერიკის ხმას“ განუცხადა.

„დარწმუნებული ვარ, რომ ბატონი ივანიშვილი მზადაა იგივე გეზი განაგრძოს და წინ წაწიოს ურთიერთობა ნატოსთან. შესაბამისად, ნატოც ერთგული რჩება იმ დაპირებებისა, რომლებიც ბუქარესტის სამიტზე დაფიქსირდა“ - განაცხადა აპატურაიმ.

ინტერვიუში აპატურაიმ მოახლოებულ წლიურ ეროვნულ პროგრამაზეც ისაუბრა და აღნიშნა, რომ წელს საქართველო იმ ტესტის მიხედვით შეფასდება, რომელიც წარმატებით ჩააბარა.

გენერალური მდივნის წარმომადგენელი იმ თემასაც შეეხო, რომელიც პროგრამის ფარგლებში ადრეც იქნა განხილული, საუბარია სასამართლოს საკითხზე, რომელსაც ნატო-მ ყურადღება მიაქცია და პრობლემურ საკითხად მიიჩნია.

აპატურაიმ ხაზი გაუსვა, რომ ყოველთვის და ყველა ქვეყნისთვის არსებობს პრობლემური საკითხები და წლიური ეროვნული პროგრამის მიზანი სწორედ ამ საკითხებზე ყურადღების გამახვილება და მათზე მუშაობაა.

„ჯერ კიდევ მრავალი გასაკეთებელის მიუხედავად, არჩევნების წარმატებით ჩატარება საკმაოდ პოზიტიური ფაქტია. განსაკუთრებით კი, ისეთი რეგიონისთვის, სადაც მოცემული მოვლენა არც თუ ისე ხშირია“ - განაცხადა ნეტო-ს გენმდივნის სპეციალურმა წარმომადგენელმა.