საპარლამენტო უმრავლესობის წევრის ვიქტორ დოლიძის თქმით, „ქართული ოცნება“ მზადყოფნას გამოთქვამს, ქვეყნისთვის სტრატეგიულად მნიშვნელოვან საკითხებზე „ნაციონალურ მოძრაობასთან“ ითანამშრომლოს.

მისი თქმით, „ქართული ოცნება“ „ნაციონალური მოძრაობის“ მხრიდან კოსტრუქციულ თანამშრომლობას მიჩვეული არ არის, თუმცა, მისივე თქმით, თუკი „ნაციონალურ მოძრაობაში“ გარდასახვა მოხდება, ეს მხოლოდ მისასალმებელია.

„ჩვენ მზად ვართ, რომ ყველა საჭირბოროტო საკითხთან დაკავშირებით ვითანამშრომლოთ მათთან. არის საკითხები, რაზეც განსხვავებული შეხედულებები გვაქვს, მაგრამ არის სტრატეგიული საკითხები, რომლთან დაკავშირებითაც უნდა ვითანამშრომლოთ“ - განცხადა დოლიძემ.

იგი გუბერნატორებისა და გამგებლების არჩევის წესთან დაკავშირებით პრეზიდენტის ინიციატივასაც გამოეხმაურა და აღნიშნა, რომ თვითმმართველობის დეცენტრალიზაცია და მისი გაძლიერება „ქართული ოცნების“ პრიორიტეტია.