საქართველოს პრეზიდენტი მიხეილ სააკაშვილი ქვეყნის საგარეო პოლიტიკურ საკითხებთან დაკავშირებით ახალ მთავრობასთან თანამშრომლობისთვის მზადყოფნას გამთქვამს.

როგორც მან მერვე მოწვევის პარლამენტის პირველი სხდომის გახსნისას განაცხადა, დღეს დაპირისპირების დრო არ არის, რადგან მსოფლიო უნდა დარწმუნდეს, რომ საქართველოს დემოკრატიული პრინციპები ამოძრავებს.

„უნიკალური შანსი გვეძლევა ვაჩვენოთ ქართველ ხალხს და მთელ მსოფლიოს, რომ ყველას გვამოძრავებს დემოკრატიული პრონციპები და ჩვენი ქვეყნის ერთიანობა. დღეს არ არის ბრაზის, შურისძიების და სიმწრის დრო. ეს არის ერთობლი განხილვის, დებატების და საქმის კეთების დრო“ - განაცხადა სააკაშვილმა და დასძინა, რომ ევროკავშირთან და ნატოსთან დაკავშირებულ პროცესებში მომავალ პრემიერ-მინისტრს ბიძინა ივანიშვილს მან პირადად შესთავაზა თანამშრომლობა და ამ პროცესში ჩართვა როგორც პირადად პრეზიდენტის, ისე უშიშროების საბჭოს მხრიდანაც.

პრეზიდენტის თქმით, ევროკავშირი და ნატო ქვეყნისთვის მნიშვნელოვანი თემებია, რომლებიც უფრო მაღლა დგას, ვიდრე მთავრობასა და ოპოზიციას შორის არსებული პოლიტიკური განსხვავებები.

მისივე განცხადებით, იგივე შეიძლება ითქვას ტერიტორიული მთლიანობის აღდგენის გზებსა და საგარეო საფრთხეებისგან დაცვის საკითხებზე.

„მე, ჩემს გუნდთან ერთად მსურს ვემსახურო ქართველ ერს, ყველა ამ საკითხებთან დაკავშირებით ვითანამშრომლო საქართველოს მთავრობასთან. ჩვენი ხალხის უმაღლესი ინტერესი ყველსა ჩვენგანზე მაღლა დგას, იმ ადამიანებზე მაღლა, ვინც ახლა ამ დარბაზში ვიმყოფებით. ყველას მოგიწოდებთ კარგად იმუშაოთ, რათა ღირსეულად ემსახუროთ ამ უმაღლეს ინტერესს“ - განაცხადა სააკაშვილმა.

სიტყვით გამოსვლის დასრულებისას, მან „ქართულ ოცნებას“ წარმატება მიულოცა და ხალხის საკეთილდღეოდ ნაყოფიერი და შინაარსიანი მუშაობა უსურვა.