საქართველოს პრეზიდენტი მოხარულია, რომ გუშინდელი ოპოზიცია დღეს უმრავლესობით პარლამენტში მოვიდა და არ გამორიცხავს, რომ დღევანდელი ოპოზიცია ხვალ ისევ ხელისუფლებაში დაბრუნდეს.

„გუშინდელი ოპოზიცია დღეს მთავრობაში ხართ, ხოლო ვინც დღეს ოპოზიციაშია, თქვენ წარმოიდგინეთ, შესაძლოა კვლავ ხელისუფლებაში მოვიდეს და ყოველივე ეს არის ის არის, რაც ჩვენ ყველამ ერთად უნდა ვაღიაროთ“ - განაცხადა სააკაშვილმა.

პროცესების დემოკრატიულად წარმართვისთვის პრეზიდენტმა პოლიტიკოსებს საკუთარ თავზე მუშაობისკენ მოუწოდა.

„ჩვენ არ ვართ ერთმანეთის მტრები, არამედ ერთმანეთის პოლიტიკური მეტოქეები ვართ. ეს კამპანია იყო რთული, უხამსი და გესლიანი, ალბათ ყველა მხრიდან, მაგრამ ახლა თქვენ მთელს ერს წარმოადგენთ, არა მის ნაწილს, არამედ მთელს, მარავალეთნიკურ ერს“ - მიმართა სააკაშვილმა უმრავლესობას.

მისი თქმით, 2008 წელს, როდესაც ის პარლამენტში შედიოდა, დღევანდელი უმრავლესობის ნაწილი ქუჩაში იდგა და აქციებში მონაწილეობდა იმის გამო, რომ უარი თქვეს მანდატებზე.

„დღეს ძალიან კმაყოფილი ვარ რომ აქ ხართ. აქ სხვა კლიმატია, სხვა ატმოსფეროა და შესაძლოა, აქ ყოფნა ბევრად უფრო სასარგებლო აღმოჩნდეს, ვიდრე გარეთ ჰაერზე დგომა“ - განაცხადა სააკაშვილმა.

მისი თქმით, დადგა მუშაობისა და წინასაარჩევმნოდ გაცემული დაპირებების შესრულების დრო.