საქართველოს მერვე მოწვევის პარლამენტის პირველი სხდომა დღეს გაიმართება. კანონის თანახმად, სხდომა ქუთაისში პარლამენტის ახლადაშენებულ შენობაში შედგება.

როგორც ცნობილია, 1 ოქტომბრის საპარლამენტო არჩევნების შედეგად, საკანონმდებლო ორგანოში კოალიცია „ქართული ოცნება“ 85 დეპუტატით იქნება წარმოდგენილი, ხოლო „ერთიანი ნაციონალური მოძრაობა“ 65 დეპუტატს შეიყვანს. თუმცა, კოალიციაში აცხადებენ, რომ არ არის გამორიცხული, „ქართულმა ოცნებამ“ საკონსტიტუციო უმრავლესობასაც მიაღწიოს, ვინაიდან „ნაციონალური მოძრაობიდან“ მათ გუნდში გადასვლის სურვილი ბევრ დეპუტატს აქვს.

კოალიცია პარლამენტში, სავარაუდოდ, სამ ფრაქციას შექმნის. ამდენივეს ჩამოყალიბებას გეგმავს „ნაციონალურ მოძრაობა“ - „ერთიანი ნაციონალური მოძრაობა“, „ერთიანი ნაციონალური მოძრაობა - რეგიონები“ და „ერთინი ნაციონალური მოძრაობა - მაჟორიტარები“.

უკვე ცნობილია, რომ საპარლამენტო უმცირესობის ლიდერი დავით ბაქრაძე იქნება, უმრავლესობას კი, სავარაუდოდ, დავით საგანელიძე უხელმძღვანელებს, თუმცა მისი კანდიდატურა ოფიციალურად კოალიციის ლიდერს ამ დრომდე არ დაუსახელებია.

მე-8 მოწვევის პარლამენტის პირველი სხდომა ქუთაისში 13:00 საათზე გაიმართება.