საქართველოს საგარეო საქმეთა სამინისტრო ლიბანის დედაქალაქ ბეირუთში განხორციელებულ ტერორისტულ აქტს მკაცრად გმობს და ღრმა შეშფოთებას გამოხატავს.

როგორც საგარეო საქმეთა სამინისტროს განცხადებაშია ნათქვამი, აფეთქების შედეგად რამდენიმე ადამიანი დაიღუპა, მათ შორის ლიბანის უსაფრთხოების სამსახურის უფროსი, გენერალი ვისამ ალ ჰასანი.

„სამინისტრო სამძიმარს უცხადებს ტერაქტის შედეგად დაღუპულთა ოჯახებს და დაზარალებულებს თანაუგრძნობს. ქართული მხარე ყველას უსაფრთხოებისა და სტაბილურობის შენარჩუნებისკენ მოუწოდებს და მიაჩნია, რომ მსგავსი ძალადობრივი ქმედებები გაუმართლებელია“ - ნათქვამია განცხადებაში.

ბეირუთში მომხდარ აფეთქებას ათი ადამიანი ემსხვერპლა, 80 ადამიანზე მეტი კი მძიმედ დაშავდა.

აღნიშნულ აფეთქებას მთელი ლიბიის მასშტაბით საპროტესტო აქციები მოჰყვა. დემონსტრანტებმა ერთდროულად რამდენიმე ქალაქში საბურავები დაწვეს.

მომხდარის გამო ისინი უშუალოდ ხელისუფლებას ადანაშაულებენ, და ლიბანის პრემიერ -მინისტრის დაუყონებლივ გადადგომას მოითხოვენ.