„ქრისტიან-დემოკრატიული მოძრაობის“ ლიდერმა გიორგი თარგამაძემ დღეს პარტიის ცენტრალურ ოფისში დედაქალაქის საკრებულოს ფრაქცია „ქრისტიან-დემოკრატების“ თავმჯდომარედ ზაზა გაბუნია წარადგინა.

როგორც თარგამაძემ აღნიშნა, ზაზა გაბუნია მოქალაქეების ინტერესების დაცვის კუთხით საკრებულოში აქტიურად და ნაყოფიერად მუშაობდა.

გაბუნიას განცხადებით, მისი ფრაქცია აქტიურად იმუშავებს, იმისთვის, რომ საკრებულოს წინაშე აღმასრულებელი ხელისუფლების ანგარიშვალდებულება გაიზარდოს.

მისი თქმით, ფრაქცია „ქრისტიან-დემოკრატები“ საკრებულოში ერთ-ერთი ყველაზე აქტიური და ანგარიშგასაწევი ძალაა და ფრაქციის ყველა დეპუტატი აპარატის თანამშრომლებთან ერთად მზადაა თბილისელების ინტერესებს მომავალშიც ემსახუროს.

ამავე პრესკონფერენციაზე გიორგი თარგამაძემ დეპუტატობის ახალ კანდიდატად კახა ბროკიშვილი წარადგინა, რომელიც საკრებულოში „ქრისტიან-დემოკრატების“ გლდანის ყოფილი მაჟორიტარი დეპუტატობის კანდიდატის ინგა გრიგოლიას ნაცვლად შევა.