პრემიერ-მინისტრობის კანდიდატს ბიძინა ივანიშვილს საფრანგეთის რესპუბლიკის მოქალაქეობა უახლოეს მომავალში შეუწყდება.

ამის შესახებ „ნიუსპრესს“ ივანიშვილის ადვოკატმა შალვა თადუმაძემ განუცხადა.

მისი თქმით, ბიძინა ივანიშვილს საქართველოს მოქალაქეობა პრეზიდენტის ადმინისტრაციული აქტით მიენიჭა, თუმცა, იგი ძალაში მას შემდეგ შევა, როცა პრემიერ-მინისტრობის კანდიდატს საფრანგეთის მოქალაქეობა შეუწყდება.

როგორც მან აღნიშნა, საფრანგეთის მოქალაქეობის შეწყვეტასთან დაკავშირებით, საფრანგეთში შესაბამისი დოკუმენტაცია გასული წლის ნოემბერში შეიტანეს და ადმინისტრაციული საქმის წარმოება დაწყებულია.

„მაშინ განგვემარტა, რომ საფრანგეთის მოქალაქეობა ბიძინა ივანიშვილს შეუწყდება მხოლოდ მაშინ, რაც იგი საქართველოს მოქალაქეობას მიიღებს. შესაბამისად, დღეის მდგომარეობით გაგრძელდება აღნიშნული საქმისწარმოება და ახლო მომავალში მას შეუწყდება საფრანგეთის მოქალაქეობა“ - განაცხადა „ნიუსპრესს“ თადუმაძემ.

ადვოკატის თქმით, ამ ეტაპზე კონკრეტული ვადები ცნობილი არ არის, თუმცა, საფრანგეთის მოქალაქეობა მას ახლო მომავალში შეუწყდება.

„ჩვენ ნოემბრის თვეში მივმართეთ საფრანგეთს და ვფიქრობ, ვადები საკმარისია იმისათვის, რომ საფრანგეთში აღნიშნული საქმე დასრულდეს“ -აღნიშნა მან.

პრეზიდენტის ბრძანებულების თანახმად პრემიერ-მინისტრობის კანდიდატს ბიძინა ივანიშვილს საქართველოს მოქალაქეობა მიენიჭა.

ამის შესახებ პრეზიდენტის პრესსპიკერმა მანანა მანჯგალაძემ დღეს გამართულ ბრიფინგზე განაცხადა.

მოქალაქეობის მინიჭებასთან დაკავშირებით, პრეზიდენტის ბრძანებულება უკვე გამოიცა.

„საქართველოს მოქალაქედ მიღების შესახებ: საქართველოს მოქალაქეობის შესახებ საქართველოს ორგანული კანონის 27-ე მუხლის პირველი პუნქტის „ბ“ ქვეპუნქტისა და 33-ე მუხლის შესაბამისად მიღებულ იქნეს საქართველოს მოქალაქედ ბიძინა ივანიშვილი, დაბადებული 1956 წლის 18 თებერვალს“- აღნიშნულია ბრძანებულებაში.