„სახალხო აღმასრულებელი კრების“ ერთ-ერთი ლიდერი, „დემოკრატიული მოძრაობა-ერთიანი საქართველოს“ თავმჯდომარე ნინო ბურჯანაძე დარწმუნებულია, რომ მომავალში თანამშრომლობა „სახალხო კრებასა“ და „ქართულ ოცნებას“ შორის კიდევ უფრო გაღმავდება.

ამის შესახებ მან სასტუმრო „შერატონ მეტეხი პალასში“ მიმდინარე კონფერენციაზე ჟურნალისტებს განუცხადა.

მისი თქმით, ჯანსაღი თანამშრომლობის ფარგლებში განსხვავებული აზრი და რჩევა დაპირისპირების საფუძველი არ გახდება.

ბურჯანაძის თქმით, „სახალხო კრებას“ ბრძოლა არასდროს შეუწყვეტია, მათ შორის არც საარჩევნო პროცესში, როცა კრებაში შემავალმა ორმა პოლიტიკურმა პარტიამ - „დემოკრატიულმა მოძრაობამ“ და „თეთრებმა“ არჩევნებში მონაწილეობაზე უარი განაცხადეს.

„ესეც ბრძოლის ერთ-ერთი ფორმა იყო, რათა ხელი არ შეგვეშალა ოპოზიციური ფრონტისთვის და ხმები არ გაგვეყო“ - აღნიშნა მან.

მისივე თქმით, „სახალხო კრების“ წარმომადგენლები საარჩევნო პროცესებში ყველა რაიონში ჩავიდნენ და აქტიურად ცდილობდნენ ხელისუფლების დამარცხებისთვის ხელი შეეწყოთ.

დღესვე, ბურჯანაძე პრემიერ-მინიტრობის კანდიდატის ბიძინა ივანიშვილის მიერ მინისტრობის კანდიდატების წარდგენას გამოეხმაურა და ახალ გუნდს წარმატებები უსურვა.

„დარწმუნებულ ვარ, მათ კარგად ესმით, რომ ეს უდიდესი პასუხისმგებლობა და სირთულეა, განსაკუთრებით გარდამავალ პერიოდში. მინდა მათ ვუსურვო, რომ გაამართლონ თავად პრემიერობის კანდიდატის და ქართველი ხალხის დიდი ნაწილის ნდობა, რომელიც მათგან სერიოზულ ცვლილებებს ელოდება“-აღნიშნა ბურჯანაძემ.