საქართველოს პარლამენტის თავმჯდომარეობის კანდიდატი დავით უსუფაშვილი მიიჩნევს, რომ მოქმედი კონსტიტუციით, საქართველოში პარადოქსული ვითარებაა შექმნილი და ქვეყანაში პოლიტიკური კრიზისის თავიდან ასაცილებლად, ცვლილებების განხორცილება აუცილებელი იქნება.

ამის შესახებ უსუფაშვილმა დღეს, სასტუმრო „ქორთიარდ მარიოტში“ მიმიდინარე კონფერენციაზე - „საპარლამენტო არჩევნების შემდგომი პოლიტიკური პროცესები და სამომავლო პერსპექტივები“ განაცხადა.

მისი თქმით, დღეისთვის, აღმასრულებელი ხელისუფლება შუაზეა გაყოფილი და დიდი წილი პასუხისმგებლობა კვლავ პრეზიდენტის ხელშია.

როგორც უსუფაშვილმა განაცხადა, ვერც საზოგადოება და ვერც პოლიტიკური ძალები ვერ იქნებიან პრეზიდენტის და მისი გუნდის დაპირების იმედად იმის შესახებ, რომ ისინი ახალ მთავრობას ხელს არ შეუშლიან და პოლიტიკურ კრიზისს არ შექმნიან.

„მიამიტები არც პოლიტიკაში და არც საზოგადოებაში არ არიან, რომ ვენდოთ პრეზიდენტის და მისი გუნდის დაპირებას მათი მხრიდან კარგად მოქცევის შესახებ. ამ გუნდმა ჩემში ვერ აღძრა ნდობა იმისა, რომ სახელმწიფოებრივად საჭირო გადაწყვეტილებებს მიიღებენ“ - განაცხადა უსუფაშვილმა და აღნიშნა, რომ ახალი პოლიტიკური გუნდი არ ელოდება პრობლემებს მთავრობის დამტკიცების პერიოდში, თუმცა, მიაჩნია, რომ ქვეყნის ერთწლიანი სტაბილურობისა და წინსვლისთვის საფუძველი ძალიან მყიფეა.

აქედან გამომდინარე, უსუფაშვილის თქმით, პოლიტიკური კრიზისის თავიდან ასაცილებლად მუშაობა მიმდინარეობს.