კოალიცია „ქართული ოცნების“ საბურთალოს მაჟორიტარი დეპუტატობის კანდიდატი დავით უსუფაშვილი აცხადებს, რომ კოალიციის მიერ სამუშაო ჯგუფი  ხელისუფლებასთან მოსალაპარაკებლად არ შექმნილა.

როგორც უსუფაშვილმა ტელეკომპანია „რუსთავი 2“-ის ეთერში განაცხადა, კოალიცია ყველა გადაწყვეტილებას ნაბიჯ-ნაბიჯ, გეგმაზომიერად მიიღებს.

მისი თქმით, კოალიციის წარმომადგენლები ხვალ და ზეგ ძირითადად, არჩევნების შედეგების საბოლოო გამოკვეთით, ყველა იმ საჩივრისა და საკითხის განხილვით დაკავდებიან, რომლებიც კომისიებშია შესული. შემდეგ კი, პარლამენტის პირველი შეკრებისთვის მზადება დაიწყება.

„პირველ რიგში, კოალიციამ პარლამენტის ხელმძღვანელობა და კომიტეტები უნდა დააკომპლექტოს. შემდეგ უკვე მთავრობის საკითხები მოდის. ამ თემებზე კონსულტაციები ალბათ მომავალი კვირიდან დაიწყება“ - განაცხადა უსუფაშვილმა.

მისივე თქმით, პარლამენტის პირველ სხდომას საქართველოს პრეზიდენტი მოიწვევს. ამიტომაცაა აუცილებელი იმ სამუშაო ჯგუფის შექმნა, რომლის შესახებაც კოალიციამ დღეს განაცხადა.

„სამუშაო ჯგუფის შექმნა იმისთვისაა აუცილებელი, რომ ამ საკითხების მოსაგვარებლად პრეზიდენტთან, ხელისუფლებასთან და მის წარმომადგენლებთან ურთიერთობა გვჭირდება. ეს სამუშაო ჯგუფია, ამიტომ ხელისუფლებასთან მოსალაპარაკებლად კი არ შევქმენით, ეს ჯგუფი შევქმენით იმისთვის, რომ კონკრეტულ საკითხებზე კონსულტაციები იყოს - განაცხადა უსუფაშვილმა.

„ქართულმა ოცნებამ“ სამუშაო ჯგუფი შექმნა, რომელიც უფლებამოსილია კოალიციის სახელით აწარმოოს კონსულტაციები მოქმედ პრეზიდენტთან და მთავრობასთან.

სამუშაო ჯგუფის შემადგენლობაში ირაკლი ალასანია, დავით უსუფაშვილი და ირაკლი ღარიბაშვილი შედიან.