საქართველოს ჟურნალისტური ეთიკის ქარტია კონკრეტულ პირთა პერსონალური მონაცემების გასაჯაროების შესახებ გაზეთ „ასავალ  დასავალის“ გადაწყვეტილებას გმობს.

როგორც ჟურნალისტური ეთიკის ქარტიის განცხადებაშია ნათქვამი, მიუხედავად იმისა, რომ გლდანის ციხის მიმართ საზოგადოების ინტერესი ძალია დიდია, აღნიშნული საქმეები სერიოზული სამართლებრივი და ჟურნალისტური გამოძიებების საგანი უნდა იყოს.

განცხადების თანახმად, მოქალაქეთა პერსონალური ინფორმაცია განსაკუთრებულ დაცვას საჭიროებს და მისი დაუსაბუთებლად გასაჯაროება არ უნდა ხდებოდეს.

„მოქალაქეების პერსონალური ინფორმაციის, მათ შორის, საცხოვრებელი მისამართების გამოქვეყნება ისეთი მნიშვნელობის ინფორმაციას არ წარმოადგენს, რომელიც არსებული ვითარების მოგვარებას ხელს შეუწყობს. უფრო მეტიც, შეიძლება ძალადობა წააქეზოს“ - ნათქვამია განცხადებაში.

ჟურნალისტური ეთიკის ქარტია ხელმომწერ და არახელმომწერ ჟურნალისტებს მოუწოდებს, ადამიანის პერსონალური მონაცემების გამოქვეყნებას განსაკუთრებული პასუხისმგებელობით მოეკიდონ, რადგან წინასწარ იმის განსაზღვრა, თუ რა ზიანი შეიძლება მოუტანოს მსგავსი ინფორმაციის გამჟღავნებამ იდენტიფიცირებულ ადამიანებს და მათი ოჯახის წევრებს, შეუძლებელია.

გაზეთმა „ასავალ დასავალმა“ გლდანის #8 დაწესებულების ადმინისტრაციის თანამშრომლების სახელები და მისამართები 2-7 ოქტომბრის ნომერში გამოაქვეყნა.