ახალი მინისტრთა კაბინეტის შემადგენლობის სამუშაო მონახაზი მხოლოდ კოალიცია „ქართული ოცნების“ ლიდერმა ბიძინა ივანიშვილმა იცის და კოალიციის შიგნით ის ჯერჯერობით არ განუხილავთ.

ამის შესახებ ივანიშვილმა დღეს ჟურნალისტებს განუცხადა.

„ჩვენ დღეს პირველი შეხვედრა გვქონდა. მინისტრების კანდიდატებთან დაკავშირებით ჩემს გუნდში არავინ არაფერი იცის, ეს მხოლოდ მე მაქვს თავში, არავისთვის არაფერი მითქვამს“ - აღნიშნა ივანიშვილმა.

მისი თქმით, ის არც ერთ კანდიდატურას არ დაასახელებს, ვიდრე ჯგუფთან არ განიხილავს. ასევე, არ გამორიცხავს, რომ მისი პირველადი მონახაზი სერიოზულად შეიცვალოს.

„ჩემი ჯგუფის არც ერთმა წევრმა, არც ერთი კანდიდატის შესახებ არ იცის, გარდა ჩემი პრემიერ-მინისტრობის კანდიდატურისა. პირველი პროექტი მაქვს მე, რასაც გუნდთან ერთად განვიხილავ. შესაძლოა, ჩემი პროექტი ძალიან შეიცვალოს“ - აღნიშნა ივანიშვილმა.