საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო დევნილებს მოუწოდებს  უკანონო ქმედებებისგან თავი შეიკავონ.

როგორც სამინისტროს მიერ გავრცელებულ განცხადებაშია ნათქვამი, ბოლო დღეებში დევნილების მიერ შენობებში უკანონოდ შეჭრისა და ფართების თვითნებურად დაკავების ფაქტებს აქვს ადგილი.

„დევნილთა განსახლება საქართველოს კანონმდებლობის შესაბამისად მიმდინარეობს. სამინისტრო დევნილებს მიმართავს მაღალი მოქალაქეობრივი პასუხისმგებლობა გამოიჩინონ, უკანონო ქმედებებისგან თავი შეიკავონ და სამართლებრივ ჩარჩოებს არ გაცდნენ“- ნათქვამია განცხადებაში.

აღნიშნული განცხადება ტაშკენტის ქუჩის შესახვევში, ყოფილი „საქნავთობის“ შენობასთან, სადაც დევნილები შეიჭრნენ, ლტოლვილთა სამინისტროს პრესსამსახურმა ჟურნალისტებს გააცნო.

„საქნავთობის“ ყოფილ შენობაში დღეს, როგორც აფხაზეთიდან ისე ცხინვალის რეგიონიდან დევნილთა ნაწილი შევიდა. ისინი აცხადებენ, რომ აღნიშნული შენობიდან 2011 წლის იანვარში სრულიად უმიზეზოდ გამოასახლეს. შენობა ეკონომიკის სამინისტროს ბალანსზეა.