კოალიცია „ქართული ოცნების“ ლიდერი ბიძინა ივანიშვილი ხელისუფლებაში მოსვლის შემდეგ, მოქალაქეების პოლიტიკურ დევნას არ აპირებს.

როგორც ივანიშვილმა დღევანდელ პრესკონფერენციაზე განაცხადა, მოსამართლეებთან დაკავშირებით ახალი პრეცედენტი შეიქმნება.

მისი თქმით, კოალიცია ყველაფერს გააკეთებს იმისთვის, რომ ყველაფერს ღირსებით უპასუხოს.

„არცერთ შემთხვევაში არ ვაპირებ პოლიტიკურ დევნას, რადგან ყველაფერს სამართლიანი სასამართლო გადაწყვეტს. ყველაფერს ვუპასუხებთ ღირსებით და რევანშისტობას არცერთ შემთხვევაში არ დავუშვებთ“ - განაცხადა ივანიშვილმა.

მისი თქმით, იმ მოსამართლის წინააღმდეგ კი, რომელმაც 5 წუთში 60-მდე საქმე გაარჩია, სარჩელს აუცილებლად შეიტანს.

„პირადად მე, აუცილებლად შევიტან სარჩელს ერთ-ერთი მოსამართლის წინააღმდეგ, რომელმაც უამრავი უსამართლო გადაწყვეტილება მიიღო. საჯაროდ ვაცხადებ, რომ ვაპირებ, მოსამართლესთან დაკავშირებით პრეცედენტის შექმნას. ამას მხოლოდ ამისთვის გავაკეთებ და არა იმიტომ, რომ შურისძიების სურვილი გამაჩნია“ - განაცხადა ივანიშვილმა და დასძინა, რომ სასამართლომ ძალიან უხეში კანონდარღვევები განახორციელა.