საქართველოში აშშ-ს ელჩმა რიჩარდ ნორლანდმა დღეს 1 ოქტომბრის საპარლამენტო არჩევნების შედეგები შეაჯამა და განაცხადა, რომ გუშინდელი არჩევნები ქართველი ხალხის გამარჯვება იყო.

აშშ-ს ელჩის განცხადებით, ამერიკა მხარს უჭერს ეუთო-ს დემოკრატიული ინსტიტუტებისა და ადამიანის უფლებათა ოფისის სადამკვირვებლო მისიის მოხსენებას.

„ვიცით, რომ ხმების დათვლა და სააპელაციო პროცედურები ჯერ კიდევ მიმდინარეობს. მათი დასრულების მიხედვით, ეს ყველაფერი საბოლოო შეფასებაში აისახება“ - განაცხადა დიპლომატმა და აღნიშნა, რომ ამერიკის მთავრობას სჯერა, რომ ეს არჩევნები ნამდვილად გამოხატავს ხალხის ნებას.

მან ქართველ ხალხს წარმატებით ჩატარებული არჩევნები მიულოცა და აღნიშნა, რომ წარმატებული არჩევნები საქართველოს დემოკრატიის გზაზე მნიშვნელოვანი წინგადადგმული ნაბიჯია.

„მიგვაჩნია, რომ გუშინდელი არჩევნები ქართველი ხალხის გამარჯვება იყო. არჩევნები ჩატარდა თანაბარი პოლიტიკური ძალის მონაწილეობით. არჩევნების შედეგებით ჩვენ ვიღებთ ახალი კონფიგურაციის პარლამენტს. ახალი კონფიგურაციით ძალთა გადანაწილებას საქართველოს პოლიტიკურ სივრცეში“ - განაცხადა მან და აღნიშნა, რომ აშშ მოუთმენლად ელის მჭიდრო თანამშრომლობას ახალ პარლამენტსა და ახალ მთავრობასთან.

ნორლანდმა იმედი გამოთქვა, რომ ახალ პარლამენტთან და მთავრობასთან თანამშრომლობა გააღრმავებს საქართველოსა და ამერიკას შორის ისედაც ღრმა ურთიერთობას.

„ჩვენ გვინდა მივულოცოთ პრეზიდენტ სააკაშვილს ის, რომ მისი ხელმძღვანელობით, საქართველომ დემოკრატიული განვითარების გზაზე კიდევ ერთი ნაბიჯი გადადგა. ჩვენ ასევე, ვულოცავთ ბიძინა ივანიშვილს საპარლამენტო არჩევნებში მისი პოლიტიკური კოალიციის „ქართული ოცნების“ გამარჯვებას“ - განაცხადა მან.

რიჩარდ ნორლანდის თქმით, შეერთებული შტატები იმედოვნებს და მხარს უჭერს არჩევნებში მონაწილე ორივე ძალას, რათა მათ ითანამშრომლონ ქართველი ხალხის უკეთესი მომავლის ერთობლივი ძალით ასაშენებლად.