აშშ-ს ელჩმა საქართველოში რიჩარდ ნორლანდმა და სენატორებმა ჯინ შაფინმა და ჯეიმს რიშმა ბიძინა ივანიშვილს საპარლამენტო არჩევნებში გამარჯვება პირადად მიულოცეს და ამერიკა-საქართველოს მეგობრობის გაგრძელებისა და გაღრმავების იმედი გამოთქვეს.

როგორც „ფეისბუქზე“ საარჩევნო ბლოკ „ბიძინა ივანიშვილი - ქართული ოცნების“ ლიდერის ბიძინა ივანიშვილის გვერდზე განთავსებულ ინფორმაციაშია აღნიშნული, ამერიკელი სტუმრები ივანიშვილმა ბიზნესცენტრში მიიღო. სტუმრებმა მას არჩევნებში მიღწეული წარმატება მიულოცეს.

„ჩვენ აქ ბატონ ბიძინასთან შესახვედრად მოვედით და გვინდოდა, რომ მისთვის ქართული ოცნების წარმატება მიგველოცა“ - განაცხადა შეხვედრის დასრულების შემდეგ სენატორმა ჯინ შაჰინმა.

ჯეიმს რიშმა ამერიკა-საქართველოს შორის არსებული მეგობრული ურთიერთობის კიდევ უფრო გაღრმავდების და გაძლიერების იმედი გამოთქვა. მან გამარჯვება ქართველ ხალხსაც მიულოცა.

„გუშინ ისტორიული დღე იყო მთელი ქართველი ხალხისთვის და როგორიც უნდა იყოს შედეგები, ცვლილება უკვე სახეზეა იმ მიმართებით თუ როგორ ჩატარდა ეს ყველაფერი. ახლოდან ვაკვირდებოდით და გავოცდით მე და სენატორი შაჰინი თუ როგორ განხორციელდა ეს ცვლილება“ - განაცხადა რიშმა და დასძინა, რომ ამერიკა-საქართველო კარგი მეგობრები არიან და რომ მისი სურვილია ეს მეგობრობა შენარჩუნდეს.


თავის მხრივ, ბიძინა ივანიშვილმა მადლობა გადაუხადა სენატორებს არჩევნებზე დაკვირვებისა და მილოცვისთვის და განაცხადა, რომ სენატორებთან საუბარი შეეხო იმას თუ როგორ განვითარდება ორ ქვეყანას შორის ურთიერთობა და დემოკრატია საქართველოში.

აღინიშნა, რომ 1 ოქტომბერს მნიშვნელოვანი ნაბიჯი გადაიდგა წინ არა მარტო საქართველოს, არამედ დემოკრატიისთვისაც.