საქართველოს პრეზიდენტი მიხეილ სააკაშვილი, როგორც ჩანს, „ვარდების რევოლუციიდან“ 8 წლის შემდეგ, მილიარდერთან დამამცირებლად მარცხდება.

სტატიას სახელწოდებით - „ქართული ეგზიტპოლი მიანიშნებს იმაზე, რომ ბიძინა ივანიშვილი იმარჯვებს“ - Guardian-ი აქვეყნებს.

როგორც სტატიაშია აღნიშნული, იმ შემთხვევაში, თუ მიხეილ სააკაშვილი ხელისუფლებაში დარჩა და მისმა პარტიამ ძალაუფლება შეინარჩუნა მარცხის მიუხედავად, საქართველო შესაძლოა, არეულობის ან იქნებ უფრო უარეს ფაზაშიც შევიდეს.

სტატიის თანახმად, ეგზიტპოლის პირველმა მაჩვენებლებმა, როგორც ჩანს, მილიარდერ ბიძინა ივანიშვილს საპარლამენტო არჩევნებში გამარჯვება მოუტანა, თუმცა, მან შეიძლება პრემიერ-მინისტრის პოსტის დაკავება ვერ შეძლოს.

„თუ ეგზიტპოლის შედეგები დადასტურდა, ეს მიხეილ სააკაშვილისთვის გამანადგურებელი მარცხი იქნება, რომელიც ხელისუფლებაში ე.წ. „ვარდების რევოლუციით“ მოვიდა, მაგრამ რვა წლის მმართველობის შემდეგ მას ავტორიტარულ ქცევაში სულ უფრო ხშირად სდებდნენ ბრალს“- ნათქვამია სტატიაში.

Guardian-ი ასევე წერს, რომ ქართულმა საარჩევნო სისტემამ ივანიშვილის გამარჯვება შეიძლება ვერ უზრუნველყოს, ეგზიტპოლი მხოლოდ პარტიული სიით არჩეული 77 დეპუტატის მონაცემებს არკვევს. დანარჩენი 73 საოლქო მანდატებია, სადაც სააკაშვილს მტკიცე უპირატესობა აქვს.

„ერთმა წყარომ მთავრობიდან აღიარა, რომ სააკაშვილმა არჩევნები წააგო, მაგრამ თქვა, რომ შესაძლოა „ნაციონალურმა მოძრაობამ“ მაინც შეინარჩუნოს „მცირე უპირატესობა“. მათი თქმით, სააკაშვილის აშკარა მარცხი სამართლიან არჩევნებში ძირითადად, იმის მაჩვენებელია, რომ ბრალდებები მისი დესპოტიზმის შესახებ ნამდვილად მცდარია“ - წერს Guardian-ი.

ასევე, სტატიაში აღნიშნულია, რომ სააკაშვილი პრეზიდენტად 2013 წლამდე უნდა დარჩეს. თუ ივანიშვილი საპარლამენტო უმრავლესობას მოიგებს, ის პრემიერ-მინისტრი გახდება, მაგრამ რთული წარმოსადგენია, როგორ იმუშავებს ეს ორი კაცი ერთად.

სტატიის თანახმად, ივანიშვილის თანამშრომლებმა მიანიშნეს, რომ ისინი სააკაშვილისგან გადადგომას ელიან.

მასალა მომზადებულია foreignpress-ის თარგმანზე დაყრდნობით.