კოალიცია „ქართული ოცნების“ პრესსპიკერი მაია ფანჯიკიძე ლაგოდეხის მაჟორიტარი დეპუტატობის კადიდატის ლუკა კურტანიძის მიერ „ნაციონალური  მოძრაობის“ აქტივისტების ცემას უარყოფს და მას დეზინფორმაციას უწოდებს.

ფანჯიკიძე „ნაციონალური მოძრაობის“ პრესსპიკერის ჩიორა თაქთაქიშვილის განცხადებას „ქართული ოცნების“ მედიაცენტრში გამოეხმაურა და აღნიშნა, რომ დაპირისპირებისა და ცემის შესახებ გავრცელებული ინფორმაცია სიმართეს არ შეესაბამება.

„ეს არის სრული ტყუილი და დეზინფორმაცია. ლუკა კურტანიძე მართლაც მივიდა სოფელ ცოდნისკარში, #8 საარჩევნო უბნის ტერიტორიაზე, რადგან ჰქონდა ინფორმაცია საარჩევნო დარღვევების შესახებ. თუმცა, არანაირ დაპირისპირებას და ცემის ფაქტს ადგილი არ ჰქონია. როგორც ჩანს, ხელისუფლებამ სხვა დარღვევბის დამალვა და გადაფარვა მოინდომა მორიგი პროვოკაციის მიზნით“ - განაცხადა ფანჯიკიძემ.

მან საარჩევნო პროცედურების დარღვევებზეც ისაუბრა და კოალიციის აქტივისტების ცემისა და დაკავების რამდენიმე ფაქტი დაასახელა.

მისი თქმით, საარჩევნო პროცესის დასრულების მოახლოებასთან ერთად, პროცესები მწვავდება და მოსახლეობას სიმშვიდის შენარჩუნებისკენ კიდევ ერთხელ მოუწოდა.