კოალიციამ „არჩევნის თავისუფლებისთვის“ საპარლამენტო არჩევნების მიმდინარეობისას დარღვევები რეგიონებშიც დააფიქსირა.

როგორც „ნიუსპრესს“ კოალიციიდან აცნობეს, ქვემო ქართლში სოფელ ცურტავის #9 და #62 უბნები ერთმანეთის გვერდითაა განთავსებული და ამომრჩეველი ხმას ორივეგან აძლევს.

„არჩევნის თავისუფლების“ წარმომადგენლების თქმით, დმანისში #48 და #2 უბანზე ბეჭედი გაფუჭდა და ამომრჩეველი ხმას ბეჭდის გარეშე აძლევს.

მათივე განცხადებით, გარდაბანში #25 საარჩევნო უბნის კომისიის თავმჯდომარე საჩივრებს არ იბარებს იმ მოტივით, რომ ბლანკები არ აქვთ, ფურცელზე დაწერილს არ იღებენ და ქსეროქსის აპარატი გაფუჭებულია.

რაც შეეხება გურიას, „არჩევნის თავისუფლებისთვის“ ინფორმაციით, ჩოხატაურის რაიონის სოფელ საჭამიასერში უსინათლო ამომრჩეველს ბიულეტენი სხვამ შემოუხაზა, შემდეგ ბიულეტინი გახსნეს და ხმამაღლა წაიკითხეს თუ ვის მისცა ხმა. ფაქტი არავის გაუპროტესტებია.

კოალიციის წარმომადგენლებმა ქუთაისშიც რამდენიმე დაღვევა დააფიქსირეს. მათი ინფორმაციით, #62 უბანზე ამომრჩეველი წინასწარ შემოხაზული ბიულეტენით მივიდა. #25 უბანზე კი, კოალიცია „ქართული ოცნების“ კომისიის წევრი ტელეფონზე ხმამაღლა საუბრის გამო შენობიდან გააძევეს.

დარღვევები ფიქსირდება ასევე, სამტრედიაში, წყალტუბოსა და ხონში.

„არჩევნის თავისუფლების“ წარმომადგენლების განცხადებით, სამცხე-ჯავახეთის რამდენიმე უბანზე დარღვევები დაფიქსირდა. კერძოდ, #4 უბანზე ხმის მიცემის კაბინაში რამდნიმე მოქალაქე შევიდა.

„ქობულეთის #8 საარჩევნო უბანზე მარკირების აპარატი არ მუშაობდა. სამეგრელოში #110 უბანზე ჯარისკაცებმა ხმა მაჟორიტარული წესითაც მისცეს. ახმეტაში, სოფელ დუისის #5 უბანში სოფლის გამგებელი მერაბ ქავთარაშვილი დამკვირვებლის სტატუსით იმყოფება და აკონტროლებს ვინ რას შემოხაზავს“ - აცხადებენ კოალიციის წარმომადგენლები.

მათივე თქმით, ხაშურის #46 უბნიდან ოპოზიციის წარმომადგენლები და დამკვირვებლები გააძევეს.