„სამართლიანი არჩევნებისა და დემოკრატიის საერთაშორისო საზოგადოების“ აღმასრულებელი დირექტორი ნინო ლომჯარია  ახალქალაქის #9 საარჩევნო უბანზე კენჭისყრის პროცესის შეჩერებას ითხოვს.

როგორც ლომჯარიამ პრესკონფერენციაზე განაცხადა, აღნიშნულ უბანზე საარჩევნო პროცესი მთელი რიგი დარღვევების ფონზე მიმდინარეობს.

მისი თქმით, საარჩევნო უბანზე მარკირება არ ხდება და ქაოსი შეინიშნება.

„ხმის მიცემა პირადობის მოწმობების გარეშე ხდება. კომისიის წევრები „ნაციონალურ მოძრაობას“ აგიტაციას უწევენ. ბიულეტენში რეგისტრატორები თავად ხაზავენ სუბიექტს და ისე აძლევენ მას ამომრჩეველს. აღნიშნულიდან გამომდინარე, კენჭისყრის პროცესის შეჩერებას და დარღვევის აღმოფხვრას ვითხოვთ“ - განაცხადა ლომჯარიამ და დასძინა, რომ წინააღმდეგ შემთხვევაში, ორგანიზაცია აღნიშნული უბნის ბათილობის საკითხს დააყენებს.

„საერთაშორისო გამჭვირვალობა-საქართველოს“ თავმჯდომარის ეკა გიგაურის განცხადებით, საარჩევნო უბანზე მყოფ პოლიტიკური პარტიების წარმომადგენლებს შესაბამისი ბეიჯები არ აქვთ.

მისი განცხადებით, აღნიშნულთან დაკავშირებით რეაგირება უნდა მოხდეს.

„ჩოხატაურსა და სამტრედიაში დავაფიქსირეთ, რომ მოქალაქეები, რომლებიც სპეციალურ სიებში არიან რეგისტრირებულები, ხმას გადასატანი ყუთებით აძლევენ. ვინც გადასატანი ყუთებით აძლევს ხმას მათი მარკირება არ ხდება, შესაბამისად, არ ვიცით ორჯერ მისცეს ხმა თუ ეს მხოლოდ ერთხელ დაფიქსირდა“ - აღნიშნა გიგაურმა.

მისივე თქმით, ბათუმის ოლქის #17 უბანზე 4 მოქალაქემ ხმა ვერ მისცა, რადგანაც მათი ხელმოწერის ადგილზე ხელი უკვე მოწერილი იყო.

გარდა ამისა, გიგაურის თქმით, მარტვილის ოლქის #3 უბანზე გადასატანი ყუთი გაიტაცეს.