კოალიცია „ქართული ოცნების“ პრესსპიკერის მაია ფანჯიკიძის განცხადებით, დედოფლისწყაროს რამდენიმე უბანზე დარღვევები ისევ დაფიქსირდა.

მისი თქმით, სოფელ ზემო მაჩხაანში #8 საარჩევნო უბანზე „ნაციონალური მოძრაობის“ კოორდინატორები საარჩევნო უბნის მიმდებარე ტერიტორიაზე აგიტაციას ეწევიან და ამომრჩევლებს ხუთიანის შემოხაზვას აიძულებენ.

ფანჯიკიძის განცხადებით, სოფელ ქოჩების #2 უბანზე რამდენიმე პიროვნება, სავარაუდოდ, „ნაციონალური მოძრაობის“ აქტივისტები, რომლებიც ავტომანქანებით მოძრაობდნენ,  ე.წ. „სომხური კარუსელის“ დატრიალებას ცდილობდნენ, კერძოდ, ისინი ხმის მიცემას იმ უბანზე ეცადნენ, სადაც სიაში არ იყვნენ.

„ამ წუთებში ვრცელდება ინფორმაცია, რომ იგივე ავტომანქანა სოფელ ხორნაბუჯში ერთ-ერთ საარჩევნო უბანთან დგას“ - აღნიშნა ფანჯიკიძემ.

კოალიციის პრესსპიკერმა კიდევ ერთ ფაქტზე გაამახვილა ყურადღება და განაცხდა, რომ შესაძლოა, ადგილი ჰქონდეს წინასწარ დაგეგმილ პროვოკაციას.

„გვაქვს ინფორმაცია, რომ სპორტის სასახლის მიმდებარე ტერიტორიაზე მოძრაობს ავტომანქანა, საიდანაც უცხო პირები კონვერტებს არიგებენ. გვაქვს ეჭვი, რომ ეს არის მორიგი პროვოკაცია, რათა გაავრცელონ დეზინფორმაცია, თითქოს, „ქართული ოცნება“ ამომრჩევლებს ფულს ურიგებს“ - აღნიშნა მან.