საარჩევნო ბლოკ „ბიძინა ივანიშვილი-ქართული ოცნების“ ნაძალადევის რაიონის მაჟორიტარი დეპუტატობის კანდიდატის თეა წულუკიანის განცხადებით, „ნაციონალური მოძრაობა“ ნაძალადევში იმ უბნებზე საარჩევნო პროცესის ჩასაშლელად ემზადება, რომლებზეც არჩევნებს აგებს.

ამის შესახებ თეა წულუკიანმა საარჩევნო შტაბში გამართულ ბრიფინგზე განაცხადა.

„მაქვს ინფორმაცია, რომ „ნაციონალური მოძრაობის“ ნაძალადევის შტაბი და მათი კანდიდატი მერაბ სამადაშვილი საღამოს იმ უბნებზე ეცდება საარჩევნო პროცესი ჩაშალოს, სადაც არჩევნებს აგებს. ასეთი უბნები ცოტა არაა. მინდა გავაფრთხილო ხელისუფლება, არ დაუშვას მსგავსი რამ, რადგან ჩვენთვის ხმების წართმევის უფლებას არავის მივცემთ“- განაცხადა წულუკიანმა.

მანვე ჟურნალისტებს იმ დარღვევების შესახებ მიაწოდა ინფორმაცია, რასაც ნაძალადევის საარჩევნო ოლქში დილიდან ჰქონდა ადგილი.

მისივე ინფორმაციით, ნაძალადევში რამდენიმე უბანი დაგვიანებით გაიხსნა. უბნების უმეტესობას არ აქვს საკმარისი ბიულეტენი, 10-მდე უბანზე კი, უკვე გამოყენებული ბეჭდები გამოიყენეს.

წულუკიანის განცხადებით, ადგილი, ასევე, ჰქონდა უბნებიდან ბიულეტენების გატანისა და ე.წ. „კარუსელების“ დატრიალების მცდელობას.

მისივე თქმით, 12.00 საათის მონაცემებით, ნაძალადევში უკვე 32 ათასზე მეტმა ამომრჩეველმა მისცა ხმა.

„აქტივობა საკმაოდ მაღალია, რაც ძალიან კარგია. მაქვს ინფორმაცია, რომ აქტიურობენ „ქართული ოცნების“ და ჩემი მხარდამჭერები“ - განაცხადა წულუკიანმა.

ნაძალადევის მე-9 საარჩევნო ოლქი თბილისში მოსახლეობის სიდიდით მესამეა. ნაძალადევში ცესკო-ს მონაცემებით, 140 500 ამომრჩეველია რეგისტრირებული.