საქართველოს ამომრჩევლის ძალიან მაღალ აქტივობაზე საუბრობენ არასამთავრობო ორგანიზაციის „პოლონელ ადვოკატთა საბჭოს” დამკვირვებლები, რომლებიც ცესკო-ს ეწვივნენ.

საბჭოს დელეგაციის წევრის მონიკა სტრეს-ვოლოსის თქმით, ისინი დილიდან თბილისის 8 საარჩევნო უბანზე იყვნენ და ელექტორატის აქტივობა თვალშისაცემია.

პოლონელი დამკვირვებლების განცხადებით, ამ დროისთვის მათ რაიმე სერიოზული დარღვევა არ დაუფიქსირებიათ და ხმის მიცემის პროცესი გამჭვირვალედ მიმდინარეობს.

„საქართველოში პირველად არის ასეთი მაღალი ინტერესი არჩევნებისადმი და ხალხს არ ეშინია გამოხატოს თავისი სიმპატია ამა თუ იმ პოლიტიკური ძალისადმი, რაც დემოკრატიის მაჩვენებელია” - განუცხადა ჟურნალისტებს დელეგაციის წევრმა ვოიცეხ მადრიჩკიმ.

მისი თქმით, „პოლონელ ადვოკატთა საბჭო” დააკვირდება ასევე არჩევნების შემდგომ პერიოდს - ხმის დათვლის პროცესს, რადგან არჩევნებამდე როგორც ხელისუფლება, ისე ოპოზიცია შესაძლო არეულობის შესახებ შიშს გამოთქვამდა.

თბილისის შემდეგ, დელეგაციის ნაწილი მცხეთის საარჩევნო უბნებს ეწვევა.