კოალიცია „ქართული ოცნების“ პრესსპიკერის მაია ფანჯიკიძის განცხადებით, დედოფლისწყაროში, სოფელ სამრეკლოში 21-ე უბანზე საარჩევნო პროცესი დარღვევებით მიმდინარეობს, რადგან „ნაციონალური მოძრაობის“ მხარდამჭერები საარჩევნო აგიტაციას ეწევიან - უბანზე შეაქვთ სარეკლამო ბუკლეტები, ასევე გადიან უბნის გარე პერიმეტრზე და თავისი ამომრჩევლები საარჩევნო უბანზე შეჰყავთ.

მისივე ინფორმაციით, სოფელ ხორნაბუჯში 22-ე უბანზე დგას ე.წ ფურგონი, სანომრე ნიშნით RAQ- 249, რომელშიც სამი ქალბატონი ზის და ამომრჩევლებს ბიულეტენებს ურიგებს.

„ქართულ ოცნებაში“ აცხადებენ, რომ დარღვევებია დედოფლისწყაროს მე-19-ე უბანზეც, სადაც ამომრჩევლის დაშინებას აქვს ადგილი. კოალიციის ცნობით, „ნაციონალური მოძრაობის“ კოორდინატორები მოქალაქეებს ბიულეტენზე შემოხაზული ხუთიანის ჩვენებას აიძულებენ.

„ქართული ოცნების“ ინფორმაციით, დარღვევები სოფელ საბათლოში მე-18-ე უბანზეც დაფიქსირდა, სადაც ელექტორატს ავალდებულებენ ბიულეტენზე შემოხაზული ნომრები კომისიას აჩვენონ.