არჩევნების პორტალ - www.electionportal.ge-ზე ამ დროის მონაცემებით, 28 ინციდენტის შესახებაა ინფორმაცია განთავსებული.

როგორც ვებ-გვერდზეა აღნიშნული, არასამთავრობო ორგანიზაცია „სამართლიანი არჩევნების“ დამკვირვებელი ბათუმის ოლქში N105 სპეცუბანზე 07:00 საათზე გაურკვეველი მიზეზის გამო არ შეუშვეს. დამკვირვებელი უნაბში 07:10 საათზე შევიდა, მაშინ როცა წილისყრა უკვე დასრულებული იყო.

„სამართლიანმა არჩევნებმა“ დედოფლისწყაროს N13 საარჩევნო უბანზე არაუფლებამოსილი პირების ყოფნა დააფიქსირა. კერძოდ, დამკვირვებელი უბანზე 06:40 საათზე მივიდა. კარი ღია დახვდა და შიგნით კომისიის ერთი წევრი იმყოფებოდა. შემდეგ კომისიის თავმჯდომარე მივიდა, რომელმაც იქ მყოფ პირებს შენობის დატოვება მოსთხოვა. უბანზე შესვლა მხოლოდ მას შემდეგ მოხერხდა, რაც კომისიის 7 წევრი შეგროვდა.

საქართველოს ახალგაზრდა იურისტთა ასოციაციის ინფორმაციით, საჩხერის #50 ოლქის 36-ე უბანზე კაბინაში სააგიტაციო მასალა იყო. დარღვევა საია-ს დამკვირვებლის მიერ ჩანაწერთა წიგნში დაფიქსირდა.

ვაკის N70 უბნის დამკვირვებელი უბანზე არ შეუშვეს. დამიკვირვებელი უბანზე 07:10 საათზე გამოცხადდა. მობილური ჯგუფის ჩარევის შემდეგ დამკვირვებელი უბანზე 07:30 საათზე შევიდა. კომისიის განცხადებით, დამკვირვებლის უბანზე არ შეშვების მიზეზად დასახელდა ის, რომ წილისყრის პროცესი უკვე დაწყებული იყო.

საია-ს ინფორმაციით, ქუთაისის #110-ე საარჩევნო უბანზე ბიულეტენების ნაკლებობაა. როგორც ვებ-გვერდზეა აღნიშნული, სიის მიხედვით 1 470 ამომრჩეველია რეგისტრირებული. უბანზე მხოლოდ 1 250 საარჩევნო ბიულეტენია მიტანილი. აღნიშნული ინფირმაცია გადამოწმდა და დადასტურდა, რომ მიღება-ჩაბარების აქტშიც იგივე რაოდენობის ბიულეტენებია დაფიქსირებული.