საქართველოს საგარეო საქმეთა ექს-მინისტრი, „საქართველოს გზის“ საპატიო თავმჯდომარე სალომე ზურაბიშვილი ფოთის მოსახლეობას სპეციალური  მიმართვით, საზოგადო და პოლიტიკური მოღვაწის, პუბლიცისტის ნიკო ნიკოლაძის დაბადების დღეს ულოცავს.

სალომე ზურაბიშვილის მიმართვა „Facebook“-ზე „ბიძინა ივანიშვილი-ქართული ოცნების“ გვერდზე გამოქვეყნდა.

როგორც მიმართვაშია ნათქვამი, სახელმწიფო მოღვაწე ნიკო ნიკოლაძე მაგალითი იყო იმისა თუ რას ნიშნავს ქვეყნის სიყვარული ყოველდღიური დაუღალავი საქმით და არა სიტყვით, როგორც, მისი თქმით, დღეს ხდება.

„მე თქვენ არ გასწავლით მან რამდენი რამ დაუტოვა თავის სამშობლოს, ჩემზე უფრო კარგად იცით ფოთელებმა. მე იმის გახსენება მინდა, რომ ასეთი უანგარო მოღვაწეობა გჭირდებათ სწორედ დღეს. გვჭირდება ადამიანები, პროფესიონალები რომლებიც ქვეყნის და არა რომელიმე პარტიის ან კლანის საქმეს გააკეთებენ და შეეწირებიან, გვჭირდება ადამიანები უშიშარნი და ერთგულნი. გვჭირდება ადამიანები არაფარისევლები, არამედ სიმართლის მთქმელნი“ - ნათქვამია მიმართვაში.

ზურაბიშვილის განცხადებით, ქვეყნის აღმშენებლობისთვის საჭიროა ისეთი ადამიანები, რომელთა მაგალითზეც მომავალი თაობები გაიზრდებიან.

„ბედნიერი ვარ, რომ თქვენ ასეთი ადამიანი გყავთ ფოთში და ამიტომ, დარწმუნებული ვარ, რომ ეკა გაიმარჯვებს თავისი ერთგულებით და სიმხნევით თქვენთან ერთად და ჩვენთან ერთად“ - განაცხადა ექს-მინისტრმა ბლოკ „ბიძინა ივანიშვილი-ქართული ოცნების“ მაჟორიტარობის კანდიდატ ეკა ბესელიასთან დაკავშირებით.

ზურაბიშვილი მიმართვაში კმაყოფილებას გამოთქვამს, რომ ვერ შედგა ნიკო ნიკოლაძის დაპროექტებული ტაძარის გახსნა „არასწორი სულისკვეთებით“ და იმედოვნებს, რომ ამ ტაძრის გახსნა ახალი საქართველოს ერთ-ერთი პირველი ზეიმი იქნება.

„მინდა ჩემო ფოთელებო, ჩემი სიყვარული, ჩემი იმედი გაგიზიაროთ, რომ ამ დღეებში ეს დიდი ბრძოლა მშვიდობიანად და სამართლიანად დამთავრდება. ჩვენ გავიმარჯვებთ საქართველო გაიმარჯვებს!“ - აღნიშნა ზურაბიშვილმა მიმართვაში და დასძინა, რომ 29 სექტემბერს ფოთში ჩავა და 1 ოქტომბერს არჩევნებში მონაწილეობის მიღებით ის საქართველოში თავის მოქალაქეობრივ ვალს მოიხდის.