ადგილობრივი თვითმმართველობების ბიუჯეტებში დაფიქსირებულია წინასაარჩევნოდ ამომრჩევლის გულის მოსაგებად განხორციელებული ხარჯების  ტენდენცია - ამის შესახებ დღეს „საერთაშორისო გამჭვირვალობა-საქართველოს“ საარჩევნო პროგრამის ხელმძღვანელმა ლევან ნატროშვილმა აღნიშნა.

მისი თქმით, „საერთაშორისო გამჭვირვალობა-საქართველომ“ გამოაქვეყნა ანგარიში 2009-2012 წლების ადგილობრივი ბიუჯეტების საარჩევნო მიზნით ხარჯვის ტენდენციების შესახებ, სადაც განსაკუთრებული ყურადღება ექცევა თბილისის, ბათუმის, ქუთაისის, ზუგდიდისა და გორის ბიუჯეტებს.

„ხუთივე ერთეულში არსებობს ხარჯების კატეგორიები, რომლებიც საარჩევნო წლებში იზრდება, ხოლო არასაარჩევნოში - იკლებს. ასეთებია-ჯანდაცვის უზრუნველყოფის, სხვადასხვა სოციალური შემწეობის ხარჯები, ინფრასტრუქტურული პროექტები, კეთილმოწყობის სხვადასხვა პროექტის ხარჯები“ - განაცხადა ლევან ნატროშვილმა.

მისი თქმით, მაგალითისთვის, გორის ბიუჯეტში არსებობს ხარჯები, რომელიც წინასაარჩევნო პერიოდში ფინანსდება, ხოლო არასაარჩევნო წელიწადში საერთოდ უქმდება. მაგალითისთვის, ასეთია სოფლის ამბულატორიის მოწყობა, სოფლის მეურნეობის ხელშეწყობის პროგრამა და ასე შემდეგ.

ნატროშვილის თქმით, გორის მუნიციპალიტეტმა, ასევე დაარღვია საარჩევნო კოდექსი, როდესაც 10 აგვისტოს ბიუჯეტში განხორციელებული ცვლილებით ზოგიერთი ხარჯი გაზარდა. რაც წინასაარჩევნო პერიოდში კოდექსით იკრძალება.

თუმცა, როგორც ნატროშვილი აცხადებს, მსგავსი დარღვევებისთვის სანქციები არაეფექტურია.

როგორც ნატროშვილმა განაცხადა, განსაკუთრებულად პრობლემურია ბიუჯეტებში არსებული კატეგორია „სხვა ხარჯები“, რადგან ბიუჯეტის ამ მუხლიდან თანხის გამოყოფა შესაძლებელია ამომრჩევლის განწყობის მოსაგებად, ადვილად განხორციელებადი პროექტების და პროგრამების დასაფინანსებლად.

როგორც ნატროშვილმა „ნიუსპრესს“ განუცხადა, აღნიშნულ ტენდენციებთან ერთად, გათვალისწინებული იქნება წინასაარჩევნო პერიოდში სხვა ტიპის ადმინისტრაციული რესურსების გამოყენებაც, როგორიცაა საჯარო მოხელეების უკანონო გამოყენება და ასე შემდეგ.
მუნიციპალიტეტების ბიუჯეტებში დაფიქსირებული ტენდენციები მნიშვნელოვანია იმისთვის, რომ დაამძიმოს წინასაარჩევნო გარემო და ის შეფასდეს როგორც არათანაბარი.