პარტია „დემოკრატიული მოძრაობის“ თავმჯდომარე ნინო ბურჯანაძე ევროკავშირის საგანგებო და სრულუფლებიან ელჩს საქართველოში ფილიპ დიმიტროვს და ლიტვის საგანგებო და სრულუფლებიან ელჩს იონას ასლაუსკასს შეხვდა.

პარტიის პრესსამსახურის ინფორმაციით, შეხვედრებზე საუბარი შეეხო ქვეყანაში შექმნილ უმძიმეს წინასაარჩევნო გარემოს, პოლიტიკურ ვითარებას და საქართველოს ციხეებში პატიმრების წამებისა და არასათანადო მოპყრობის დამადასტურებელ ვიდეოკადრებს.

„საუბრისას საგანგებო ყურადღება დაეთმო ხელისუფლების მხრიდან მოსალოდნელ საფრთხეებს როგორც არჩევნებამდე, ასევე, არჩევნების შემდგომ პერიოდში“- აღნიშნულია ინფორმაციაში.

ამასთან, ნინო ბურჯანაძემ არსებულ ვითარებასთან დაკავშირებით ელჩებს „დემოკრატიული მოძრაობის“ ხედვა გააცნო და საერთაშორისო თანამეგობრობის ადეკვატური და ობიექტური როლის მნიშვნელობასა და აუცილებლობას გაუსვა ხაზი.

გასული ორი დღის განმავლობაში ბურჯანაძე ჩეხეთის, გერმანიის, იტალიისა და საბერძნეთის საგანგებო და სრულუფლებიან ელჩებსაც შეხვდა.