საზოგადოებრივი მოძრაობა „ამომრჩეველთა ლიგის“ ერთ-ერთი ხელმძღვანელი გოგა ხაინდრავა, რომელიც საფრანგეთის ჟანდარმერიის მიერ საქართველოს პროკურატურისთვის მიწოდებულ კადრებში ფიგურირებს, აცხადებს, რომ ე.წ. „კანონიერ ქურდს“ რეზო ლორთქიფანიძეს ბავშვობიდან იცნობს.

როგორც ხაინდრავამ ტელეკომპანია „მაესტროს“ გადაცემა „სუბიექტურ აზრში“ განაცხადა, ის და ლორთქიფანიძე თბილისში ერთ უბანში ცხოვრობდნენ და ერთად გაიზარდნენ. მიუხედავად იმისა, რომ შემდეგში მათი გზები გაიყო, ის ლორთქიფანიძეს დღემდე თავის ბავშვობის მეგობრად მიიჩნევს.

რაც შეეხება საფრანგეთში ჩასვლის მიზეზს, ხაინდრავა განმარტავს, რომ 2011 წლის ნოემბერში პარიზში ცივილიზაციების უნივერსიტეტის წარმომადგენლების მიწვევით იმყოფებოდა, სადაც აფხაზეთის ომის 20 წლისთავისადმი მიძღვნილი ღონისძიება და მისი ფილმის ჩვენება იმართებოდა, ასევე, კონფერენცია იყო დაგეგმილი. მისი განცხადებით, მან ლორთქიფანიძის ოჯახის წევრებისგან იცოდა, რომ მისი ბავშვობის მეგობარი საავადმყოფოში იწვა, ამიტომ მისი ნახვა გადაწყვიტა.

„რეზო აქ 7 წელიწადი იჯდა, მერე კი ამათ საზღვარზე გადაიყვანეს და გაუშვეს იქით. საფრანგეთში 4 თვე ჰყავდათ დაკავებული, შემდეგ კი მისი ახლობლებისგან მომივიდა ამბავი, რომ ის გადაიყვანეს საავადმყოფოში, სადაც საფრანგეთის მთავრობა თავად მკურნალობდა“-აცხადებს ხაინდრავა.

მისივე თქმით, ლორთქიფანიძემ, ბავშვობის მეგობრის სტუმრობის გამო, საავადმყოფოს პერსონალს სახლში გაშვება სთხოვა.

ხაინდრავა აცხადებს, რომ პროკურატურის მიერ გავრცელებული ფოტოები სწორედ მაშინ, საფრანგეთის ერთ-ერთ რესტორანში, თავად გადაიღეს.

რაც შეეხება კადრებში დაფიქსირებულ სახლს, ხაინდრავას განმარტებით, ის ერთ-ერთ ქართველ ემიგრანტს ეკუთვნის.

საქართველოს პროკურატურამ დღეს გაავრცელა მასალა, რომელიც მისი მტკიცებით, საფრანგეთის ჟანდარმერიამ გადასცა. მასალაში ნათქვამია, რომ 2011 წლის ნოემბერში გოგა ხაინდრავა საფრანგეთში ე.წ. „კანონიერი ქურდის“, რეზო ლორთქიფანიძის სახლში ქურდული სამყაროს წარმომადგენლებს შეხვდა და საქართველოში საპარლამენტო და საპრეზიდენტო არჩევნებში დახმარება სთხოვა, სანაცვლოდ კი - საქართველოში გავლენის აღდგენა აღუთქვა. შეხვედრის ამსახველი ფოტოებიც გავრცელდა.