საარჩევნო ბლოკ „ბიძინა ივანიშვილი-ქართული ოცნების“ წარმომადგენლები მიიჩნევენ, რომ ხელისუფლება მოსახლეობის დაშინებას  კრიმინალური ავტორიტეტებით ცდილობს.

როგორც „ქართული ოცნების“ საგარეჯოს მაჟორიტარი დეპუტატობის კანდიდატმა თინა ხიდაშელმა განაცხადა, ადამიანი მეტსახელად -„ჯღანა“, რომელზეც ხელისუფლება 8 წელია საუბრობს, „ნაცმოძრაობის“ საგარეჯოს საარჩევნო შტაბში მუშაობს.

მისი თქმით, მეორე ადამიანი მეტსახელად - „ვინიპუხა“ „ნაცმოძრაობის“ საგარეჯოს მაჟორიტარი დეპუტატობის კანდიდატ გია ჩალათაშვილთან ერთად საარჩევნო პლაკატზეა გამოსახული.

ხიდაშელის განცხადებით, მესამე გმირი ალიკა დავითაშვილია, რომელიც „ქართული ოცნების“ მაჟორიტარი დეპუტატობის კანდიდატის ზურაბ ზვიადაურის წინააღმდეგ მუშაობს.

„ვინიპუხა“ პლაკატზეა გამოსახული, იმიტომ, რომ ზუსტად ქურდებით და კრიმინალური ავტორიტეტებით დააშინონ მოსახლეობა. ის შემთხვევით კი არ მოხვდა პლაკატზე. სრულიად შეგნებულადაა, რომ ყველამ იცოდეს ვისთან ექმებათ საქმე იმ შემთხვევაში, თუკი „ნაცმოძრაობას“ არ მისცემენ ხმას“ – განაცხადა ხიდაშელმა.

როგორც „ქართული ოცნების“ წარმომადგენელმა სოზარ სუბარმა განაცხადა, რამდენიმე დღის წინ, ციხიდან გაათავისუფლეს ადამიანის წამებაში ბრალდებული პირი - გვარად ხვისტანი, რომელსაც 11 წელი ჰქონდა მისჯილი.

„ეს არის ადამიანი, რომელიც ედუარდ შევარდნაძის დროს ადამიანებს აწამებდა, რომელიც მოძრაობა „კმარას“ ერთ-ერთ წევრს და ამჟამად პოლიციის ერთ-ერთ მაღალჩინოსან გოგა ონიანს გაუპატიურებით ემუქრებოდა. რამდენიმე დღის წინ, მთელი დღის განმავლობაში „ნაცმოძრაობის“ მაჟორიტარი დეპუტატობის კანდიდატი დავით ბეჟუაშვილი მის ოჯახში ქეიფობდა“ – განაცხადა სუბარმა.

მისივე თქმით, ისმის შეკითხვა, რატომ არიან „ნაციონალური მოძრაობის“ მაჟორიტარი დეპუტატობის კანდიდატები ადამიანების მწამებლებთან და კანონიერ ქურდებთან ასეთ დამოკიდებულებაში.

ამასთან, სუბარის განცხადებით, ხელისუფლებას „ქართული ოცნების“ მხარდამჭერების ტერორი დავალებული აქვს ორი ადამიანისთვის, კერძოდ, გორის რაიონში - მეტსახელად „კულას“, ხოლო მცხეთაში ვინმე ტატიშვილისთვის.