საარჩევნო ბლოკ „ბიძინა ივანიშვილი-ქართული ოცნების“ საგარეჯოს მაჟორიტარი დეპუტატობის კანდიდატი თინა ხიდაშელი საფრანგეთის პოლიციის მიერ მოპოვებულ  ვიდეომასალასთან დაკავშირებით, კომენტარის გაკეთებას მიზანშეწონილად არ მიიჩნევს.

როგორც ხიდაშელმა დღეს „ქართული ოცნების“ ცენტრალურ ოფისში გამართულ ბრიფინგზე განაცხადა, მორიგი სპექტაკლების შესახებ არანაირი პროგნოზის და კომენტარის გაკეთებას არ აპირებს.

„ნაკლებად საინტერესოა ჩემთვის მორიგი ფილმის გმირები ვინ იქნებიან. მთელ საქართველოში ჩვენს თანამოქალაქეებს იჭერენ, ციხეში აუპატიურებენ, მნიშვნელოვანი ესაა“- განაცხადა ხიდაშელმა.

როგორც „ქართული ოცნების“ წარმომადგენელმა სოზარ სუბარმა აღნიშნულ ვიდეომასალასთან დაკავშირებით აღნიშნა, ერთ-ერთი ყველაზე ცნობილი ქართველი კანონიერი ქურდის ტარიელ ონიანის დამაკავშირებელი მიხეილ სააკაშვილთან მისი ბიძაშვილი კანდიტ კვიციანია, რომელიც მესტიაში „ნაცმოძრაობის“ მაჟორიტარი დეპუტატობის კანდიდატია.

სოზარ სუბარმა ჟურნალისტებს აღნიშნული ინფორმაციის გადამოწმება კანდიტ კვიციანთან ურჩია.

საფრანგეთის ეროვნულმა ჟანდარმერიამ საქართველოს პროკურატურას გადასცა მასალა, სადაც მთავარი პროკურორის მტკიცებით, ოპოზიციის წარმომადგენლებსა და კანონიერ ქურდებს შორის შეთანხმება შედგა საქართველოში დესტაბილიზაციის გამოწვევის მიზნით.