ცესკო-სთან აქციაზე შეკრებილი მედიაორგანიზაციის წარმომადგენლებმა „ქრისტიან-დემოკრატიული მოძრაობის“ წარმომადგენელს ცენტრალურ საარჩევნო  კომისიაში გოჩა ჯოჯუას მის მიერვე მხარდაჭერილი გადაწყვეტილების უარყოფა მოსთხოვეს.

მედიასაშუალებების წარმომადგენლებმა ცესკო-ს შენობიდან გამოსულ ჯოჯუას მიმართეს და კომისიის მიერ მიღებულ გადაწყვეტილებასთან დაკავშირებით, რომელიც არჩევნებზე ფოტო და ვიდეოგადაღებას ზღუდავს, უკმაყოფილება გამოთქვეს. მათი თქმით, ჯოჯუამ ცესკო-ს უკანონო გაწყვეტილების ლეგიტიმაცია მოახდინა.

გოჩა ჯოჯუამ ჟურნალისტები აჟიტირებულობაში დაადანაშაულა და აღნიშნა, რომ მან მხარი სწორ გადაწყვეტილებას დაუჭირა.

ამასთან, ჯოჯუას თქმით, მისთვის უცნობია, რატომ მოხსნა კანდიდატურა არჩევნებიდან „ქრისტიან-დემოკრატიული მოძრაობის“ გლდანის მაჟორიტარო დეპუტატობის უკვე ყოფილმა კანდიდატმა ინგა გრიგოლიამ.

ცესკო-ს გადაწყვეტილებით, არჩევნების დღეს საარჩევნო უბნებზე ფოტო და ვიდეოგადაღება კენჭისყრის პროცესში სპეციალურად გამოყოფილი ადგილიდან იქნება შესაძლებელი. ფოტო და ვიდეოგადაღების დასაწყისიდან 10 წუთის განმავლობაში გადაადგილება თავისუფალი იქნება, ხოლო 10 წუთის შემდეგ კამერები განთავსდებიან, მინიმუმ, 3 მეტრის მანძილზე გადასაღები ობიექტიდან, სპეციალურად გამოყოფილ ადგილზე. გარდა ამისა კამერებისთვის სპეციალური ადგილი ისე უნდა იყოს გამოყოფილი, რომ საარჩევნო ყუთი ჩანდეს.გადაღება დაშვებულია პირველიდან ბოლო ამომრჩევლამდე და შემაჯამებელი ოქმის დამტკიცებამდე პერიოდის ჩათვლით. გარდა ამისა, თუ ოპერატორმა ერთხელ მაინც დატოვა საარჩევნო უბანი, ის გადაღების უფლებას კარგავს. აღნიშნული დადგენილება ცესკო-მ 11 ხმით 2-ის წინააღმდეგ დაამტკიცა. გადაწყვეტილებას მხარი „კონსერვატორებისა“ და „მრეწველების“ წარმომადგენლებმა არ დაუჭურეს. დოკუმენტის სასარგებლოდ ხმა „ქრისტიან-დემოკრატების“ წევრმა მისცა. ამის გამო, გრიგოლიამ არჩევნებიდან საკუთარი კანდიდატურა მოხსნა.