კოალიცია „ქართულ ოცნებას“ სპორტსმენი და ოლიმპიური ჩემპიონი რამაზ ნოზაძე მხარდაჭერას უცხადებს და კოალიციაში  გაწევრიანების სურვილს გამოთქვამს.

როგორც დღეს „ქართული ოცნების“ ფოთის მაჟორიტარი დეპუტატობის კანდიდატმა ეკა ბესელიამ საგანგებო ბრიფინგზე განაცხადა, „ქართულ ოცნებას“ მხარადჭერას უცხადებს ის ადამიანი, რომელმაც საქართველო მსოფლიოში არაერთხელ ასახელა.

მისი თქმით, რამაზ ნოზაძის გადაწყვეტილების მიღების ბოლო წვეთი ის ვიდეო აღმოჩნდა, რომელიც ბოლო დღეების განმავლობაში საზოგადოებამ იხილია.

„დარწმუნებული ვარ, რომ რამაზის ამ ნაბიჯს ჩვენი ქვეყნის ღირსეული მამულიშვილები შეუერთდებიან. მათ პრინციპულ გადაწყვეტილებას და ნაბიჯს უდიდესი მნიშვნელობა განსაკუთრებით ამ დღეებში აქვს“-განაცხადა ეკა ბესელიამ.

ბრიფინგზე მყოფმა რამაზ ნოზაძემ პატიმართა ოჯახების მიმართ, რომლებიც საპრობილეებში ძალადობის მსხვერპლნი აღმოჩნდენ, თანადგომა გამოთქვა და აღნიშნა, რომ გადაწყვეტილების მიღებამდე აპოლიტიკური ადამიანი იყო, მაგრამ ვიდეოს გავრცელების შემდეგ აღნიშნული გადაწყვეტილება მიიღო.

„ქართველი ადამიანი ვარ და არ ვარ იმას მიჩვეული, რომ ვინმეს წინაშე თავი დავხარო. მინდა, რომ ყველაფერი გახმაურდეს და საზოგადოებამ ყველაფერი გაიგოს“ - განაცხადა რამაზ ნოზაძემ.

მისივე თქმით, იგი ფოთში ოჯახთან ერთად გადავა ეკა ბესელიას საარჩევნო კამპანიის წარმოებაში დაეხმარება.

რამაზ ნოზაძეს, „ქართულ ოცნებაში“ გაწევრიანებისთვის განცხადება უკვე გაკეთებული აქვს.