„ქრისტიან-დემოკრატიული მოძრაობის“ ერთ-ერთი ლიდერი ლევან ვეფხვაძე აცხადებს, რომ ცესკო-ს მიერ მიღებული ახალი რეგულაციები, რომელსაც მხარი „ქრისტიან-დემოკრატიულმა   მოძრაობამ“ დაუჭირა, პარტიის დიდი გამარჯვებაა.

ამის შესახებ დღეს გამართულ ბრიფინგზე ლევან ვეფხვაძემ განაცხადა.

„ეს არის ქდმ-ს და საზოგადოების გამარჯვება. ეს არის დოკუმენტი, რომლითაც ცენტრალური საარჩევნო კომისია ვერ ახერხებს უბანზე შეზღუდოს მედიის მუშაობა. ადრე შემოთავაზებული ვარიანტით მედია ფაქტიურად ვერ შედიოდა საარჩევნო უბნებზე და იგი ჩვენს მიერ უარყოფილი იქნა“ - აღნიშნა ვეფხვაძემ.

მისი განმარტებით, ცესკო-ს მიერ მიღებული ახალი გადაწყვეტილებით, მედიის წარმომადგენლებისთვის კონკრეტული ადგილები გამოიყოფა, საიდანაც მთელი დღის განმავლობაში იქნება გადაღება ნებადართული.

„ის ინფორმაცია, რაც აღნიშნულთან დაკავშირებით ვრცელდებოდა,  სრული დეზინფორმაციაა“-განაცხადა ვეფხვაძემ და დასძინა, რომ აღნიშნული დოკუმენტი ორი დღის პრინციპული ლოდინის შემდეგ მიიღეს.

ცესკო-ს გადაწყვეტილებით, არჩევნების დღეს საარჩევნო უბნებზე ფოტო და ვიდეოგადაღება კენჭისყრის პროცესში სპეციალურად გამოყოფილი ადგილიდან იქნება შესაძლებელი. ფოტო და ვიდეოგადაღების დასაწყისიდან 10 წუთის განმავლობაში გადაადგილება თავისუფალი იქნება, ხოლო 10 წუთის შემდეგ კამერები განთავსდებიან, მინიმუმ, 3 მეტრის მანძილზე გადასაღები ობიექტიდან, სპეციალურად გამოყოფილ ადგილზე. თუ ოპერატორმა ერთხელ მაინც დატოვა საარჩევნო უბანი, ის გადაღების უფლებას კარგავს.

აღნიშნული დადგენილება ცესკო-მ 11 ხმით 2-ის წინააღმდეგ დაამტკიცა. გადაწყვეტილებას მხარი „კონსერვატორებისა“ და „მრეწველების“ წარმომადგენლებმა არ დაუჭურეს. დოკუმენტის სასარგებლოდ ხმა „ქრისტიან-დემოკრატების“ წევრმა მისცა.