ცესკო-ს იდეას სააჩევნო უბნებზე ფოტო და ვიდეო გადაღებასთან დაკავშირებით ახალი რეგულაციების შემოღების შესახებ, არასამთავრობო და მედიაორგანიზაციების მხრიდან მძაფრი წინააღმდეგობა მოყვა.  დადაგენილების პროექტი დღეს გამართულ შეხვედრაზე განიხილებოდა.

არასამთავრობო და მედიის წარმომადგენლებმა აღნიშნულ იდეას პოლიტიკურად მოტივირებული უწოდეს და ცესკო-ს თავმჯდომარე ზურაბ ხარატიშვილს მისი ავტორის დასახელება სთხოვეს.

„გვითხარით კონკრეტული პირი, კომისიის წევრი, რომელმაც აღნიშნული იდეა პირველად წამოაყენა“ - ამ მოთხოვნით ჟურნალისტმა ზვიად ქორიძემ ხარატიშვილს მიმართა.

გარდა ამისა, ჟურნალისტი მიიჩნევს, რომ ძალიან სუსტია ცესკო-ს არგუმენტი, თითქოს ფოტო და ვიდეო გადაღება, შესაძლოა, ამომრჩევლის მიერ პირად ცხოვრებაში ჩარევად იქნეს აღქმული, ვინაიდან საარჩევნო უბანი არა პირადი, არამედ საჯარო სივრცეა. მას ასევე დაუსაბუთებლად მიაჩნია კომისიის არგუმენტი იმასთან დაკავშირებით, რომ არ არის გამორიცხული, გადაღებამ ამომრჩევლის ქცევაზე გავლენა მოახდინოს, ვინაიდან გადაღება უბანზე და არა საარჩევნო კაბინაშია დაშვებული.

როგორც ცესკო-ს თავმჯდომარემ განაცხდა, იდეას კონკრეტული ავტორი არ ჰყავს და ის კომისიის 13-ვე წევრმა ერთობლივად, სამუშაო პროცესში მიიღო.
კოალიცია „არჩევნის თავისუფლებისთვის“ წარმომადგენლის მაგდა პოპიაშვილის განმარტებით, ფოტო და ვიდეოგადაღება საარჩევნო დარღვევების, მათ შორის, ე.წ. „კარუსელის“ და საარჩევნო კაბინაში 1-ზე მეტი მოქალაქის შესვლის დასაფიქსირებლად არის აუცილებელი.

„საჭიროა ინცინდეტების პრევენცია. დარღვევების შემთხვევები ბევრად უფრო ნაკლებია მაშინ, როდესაც ფოტო და ვიდეო გადაღება ხდება“-აღნიშნა პოპიაშვილმა.

აღნიშნული დადგენილება ცესკო-ს დღევანდელ სხდომაზე უნდა განიხილონ. ამასთან, ხარატიშვილი არ გამორიცხავს, რომ საკითხი დღის წესრიგიდან საერთოდ მოიხსნას ან სახეცვლილი ფორმით გავიდეს.

დადგენილების პროექტის მიხედვით, კენჭისყრის შენობაში ყოფნის უფლების მქონე პირებს შეუძლიათ დაუბრკოლებრივ გადაიღონ კენჭისყრის პროცესის ის მონაკვეთი, როცა საარჩევნო უბანზე მაღალი საზოგადოებრივი ინტერესების მქონე ამომრჩევლები - პოლიტიკური თანამდებობის პირები, საარჩევნო სუბიექტებისა და პოლიტიკური გაერთიანებების ხელმძღვანელები, რელიგიური ლიდერები და ა.შ. აძლევენ ხმას.

ამ შემთხვევებში, გადაღების ნებართვას გასცემს კომისიის თავმჯდომარე.