საქართველოში დღეს ორდღიანი ვიზიტით, ნატოს გენერალური მდივნის თანაშემწე ოპერაციების საკითხებში სტივენ ევანსი ჩამოდის.  

როგორც საგარეო საქმეთა მინისტრის მოადგილემ ნინო კალანდაძემ განაცხადა, 2 დღის განმავლობაში იგი მაღალი დონის შეხვედრებს გამართავს საქართველოს ხელისუფლების წარმომადგენლებთან და ასევე დაესწრება ნატო-სა და საქართველოს შინაგან საქმეთა სამინისტროს საგანგებო სიტუაციების მართვის დეპარტამენტის ერთობლივ საერთაშორისო წვრთნებს „საქართველო 2012“, რომელიც 22-28 სექტემბრის პერიოდში მიმდინარეობს.

კალანდაძის თქმით, წვრთნების მიზანია სტიქიური უბედურებების შედეგების სალიკვიდაციოდ უნარ-ჩვევების გამომუშავება და სახელმწიფოებს შორის კოორდინაციის გაუმჯობესება.

„საქართველო ბოლო წლებში აქტიურად აგზავნის თავის კონტინგენტს სტიქიური უბედურებებისას სხვადასხვა ქვეყანაში და გამოიკვეთა, რომ აუცილებელია ქვეყნებს შორის კოორდინაციის გაუმჯობებება და ეს წვრთნები კარგი საშუალებაა რომ სტრუქტურებმა კვალიფიკაცია აიმაღლონ“ - განაცხადა კალანადაძემ.