პრეზიდენტ მიხელ სააკაშვილის განცხადებით, ის, რაც საზოგადოებამ ბოლო დღეებში ტელევიზიებით იხილა, პირადად მისთვის მძიმე დარტყმა იყო.

„ვაღიარებ, როცა იუსტიციის მინისტრი ვიყავი, მაშინ მთლიანად ციხეს ქურდები მართავდნენ. მაშინ ციხის ადმინისტრაცია ქურდისგან იღებდა ხელფასს. ქურდი სცემდა და აუპატიურებდა დანარჩენ პატიმრებს. ჩვენ ეს ქურდები გავწიეთ გვერდზე. მაშინ პატიმარს აჭმევდა ნათესავი, ჩვენ ახლა კვება მოვაწესრიგეთ, გრძელვადიანი პაემანი შემოვიღეთ, ერთადერთი, რაც ვერ მოვაწესრიგეთ ის იყო, რომ დარჩნენ იქ ყოფილი გაიშნიკები და ორგანიზებულ დანაშაულთან შეკრულები და მოხდა ის, რაც მოხდა“ - განაცხადა პრეზიდენტმა.

მისი თქმით, ამის მიუხედავად, ემოციის ფონზე, არავინ უნდა თქვას, რომ არაფერი გაკეთებულა. პრეზიდენტი კითხულობს რომელია გამოსავალი - ყველაფრის უკან დაბრუნება თუ საქართველოს წინსვლა.

სააკაშვილის განცხადებით, გარკვეული ძალები ცდილობენ თქვან, რომ საქართველოში არაფერი შეცვლილა რვა წლის განმავლობაში. 

„ბათუმელებმა ხომ კარგად იციან ვინ იყო „რემბო“ - ბათუმის პოლიციის უფროსი. ის ყოველდღე ჰკიდებდა ადამიანებს ციხეში და აწამებდა. გუშინ ეს „რემბო“ გამოვიდა და დაგმო ძალადობა, ყველაფერს ხომ აქვს საზღვარი“ - განაცხადა პრეზიდენტმა.

მისი თქმით, რამდენიმე სადისტის და ქვეყნის მოღალატის არსებობის მხედველობიდან გამორჩენა არ უნდა გახდეს „რემბოს“ უკან დაბრუნების საფუძველი.