საპარლამენტო უმრავლესობის წევრი, სოზარ სუბარი გამოეხმაურა გავრცელებულ ინფორმაციას, რომ უკრაინა მიხეილ სააკაშვილს კორუფციაში ამხელს და განაცხადა, რომ სააკაშვილმა საქართველოში მანამდე არარსებული ელიტური კორუფციის სისტემა შექმნა და ქვეყნის ყველა რესურსი რამდენიმე ადამიანის ხელში იყო თავმოყრილი.

მისივე განცხადებით, მიხეილ სააკაშვილს იგივე უკრაინაში არ გამოუვიდა, მაგრამ სადაც გამოუვიდა, ანუ უკრაინის რკინიგზაში, იქ გააკეთა.

„მიხეილ სააკაშვილი, ზურაბ ადეიშვილი, გიზო უგულავა, ესენი არიან ადამიანები, რომლებმაც საქართველოში შექმნეს მემგონი მანამდე არსად გამოცდილი და არსად ნახული კორუფციული სქემა, როდესაც ელიტური კორუფცია იყო, როცა რამდენიმე ადამიანის ხელში იყო თავმოყრილი მთელი ქვეყნის აბსოლუტურად ყველა რესურსი და ცხადია მათ სურდათ იგივე გადაეტანათ უკრაინაში. უკრაინაში ეს ვერ გამოუვიდათ, მაგრამ სადაც გამოუვიდათ იქ გააკეთეს, გააკეთეს უკრაინის რკინიგზაში. კორუფციულ სქემებს რაც შეეხება ერთი, რაც მკაფიოდ გამოიკვეთა და რაც სხვათა შორის თავის დროზე საქართველოს რკინიგზაშიც ჰქონდათ გაკეთებული, 5-ჯერ შეამცირეს ტარიფები, ოღონც შეამცირეს ტარიფები ბიუჯეტისთვის და როგორც გამომძიებლები ამტკიცებენ არ შეუმცირებიათ რეალური ტარიფები გადამზიდავებისთვის, ანუ გადამზიდავები იხდიან იმდენივეს უბრალოდ 1/5 მიდის ბიუჯეტში, 4/5 მიდის ამ კორუფციაში ჩართული ადამიანების ჯიბეში“ - განაცხადა სოზარ სუბარმა.