ფილარმონიასთან მიმდინარე აქციაზე სასულიერო პირებიც იმყოფებიან. ისინი ჟურნალისტებთან საუბრისას აცხადებენ,  რომ ის, რაც სასჯელაღსრულების დაწესებულებაში ხდება, დანაშაულია ერისა და კაცობრიობის წინაშე.

როგორც ფერისცვალების მამათა მონასტრის არქიმანდრიტრმა ბართლომე ფირცხალაშვილმა „ნიუსპრესს“ განუცხადა, ვითარება გამოსასწორებელია არამხოლოდ სასჯელაღსრულების სისტემაში, არამედ მთელ ქვეყანაში.

„ამაზრზენი ფაქტები, რომელიც გუშინ გამოქვეყნდა და ახლა ცდილობენ ვიღაცეებს გადააბრალონ, დანაშაულია. მთავრობის ყველა წევრი პირველი პირიდან მოყოლებული სისხლის სამართლის დამნაშავეა“-განუცხადა „ნიუსპრესს“ არქიმანდრიტმა ფირცხალაშვილმა.

დავით გარეჯში მოღვაწე მღვდელ-მონაზონ კირიონის თქმით, სასულიერო პირები ჩვეულებრივი მოქალაქეები არიან და საკუთარი მოქალაქეობრივი პოზიციის დაფიქსირება ჩვეულებრივი მოვლენა უნდა იყოს.

„იმ კადრებზე, რაც გავრცელდა ვერაფერს ვიტყვი, თუ ჩვენ ამის კომენტირებას დავიწყებთ, ეს ჩვენი აზროვნების დეფორმაცია იქნება. ეს არის გაუგონარი ამბავი. პატიმრებზე მსგავსი ძალმომრეობა უკვე ცოდვაც აღარ არის, ეს სატანიზმია“ - აღნიშნა მღვდელ-მონაზონმა კირიონმა.

საპროტესტო აქცია ამ წუთებში ფილარმონიასთან მიმდინარეობს.