საქართველოს პარლამენტის თავმჯდომარე დავით ბაქრაძე გლდანის მე-8 დაწესებულებაში პატიმართა მიმართ
 არაადამიანური მოპყრობის ფაქტების ამსახველი ვიდეომასალის ნახვით შეძრწუნებულია - ამის შესახებ დავით ბაქრაძემ განცხადება „ფეისბუქის“ საკუთრ გვერდზე გამოაქვეყნა.

განცხადების თანახმად, ის საზოგადოებრივ მაუწყებელზე მიმდინარე დაბატების გამო, გლდანის ციხეში მომხდარი დანაშაულის ამსახველ კადრებს გვიან ღამით გაეცნო.

„შეძრწუნებული და შოკირებული ვარ. ასეთი დანაშაულის ჩამდენების და ორგანიზატორების ადგილი არ არის იმ ახალ საქართველოში, რომელსაც ყველა ერთად ვაშენებთ. როგორც ადამიანს და როგორც პოლიტიკოსს, მიმაჩნია, რომ ყველა ეს ადამიანი უმკაცრესად უნდა დაისაჯოს. ასევე, უნდა დაისაჯოს ყველა ის თანამდებობის პირი, ვინც სისტემაში ამგვარი დანაშაულის არსებობა დაუშვა“ - ნათქვამია ბაქრაძის განცხადებაში.

პარლამენტის თავმჯდომარე საზოგადოებას ჰპირდება, რომ აღნიშნულ ფაქტს ბოლომდე გამოიძიებენ. ასევე, ყველა დამნაშავე იქნება დასჯილი, ხოლო სისტემაში ისეთ ზომებს გაატარებენ, რომელიც ამგვარი დანაშაულის განმეორებას სამომავლოდ გამორიცხავს.

გლდანის მე-8 საპყრობილის ადმინისტრაციის თანამშრომლების მიერ პატიმრის ფიზიკური შეურაცხყოფის ამსახველი კადრები თავდაპირველად საქართველოს შინაგან საქმეთა სამინისტრომ გაავრცელა. შსს-ს მტკიცებით, პატიმართა მიმართ არაადამიანური მოპყრობის ორგანიზება, მათი ვიდეოფირზე დაფიქსირება და სოლიდური ფულადი ანაზღაურების სანაცვლოდ, დამკვეთებისთვის გადაცემის შეთავაზება საპყრობილის თანამშრომლებმა ამავე საპყრობილეში განთავსებული თამაზ თამაზაშვილისგან მიიღეს. თამაზაშვილი წინა ხელისუფლების დროს შსს-ს მაღალჩინოსანი იყო. მისი სიძე „ქართული ოცნების“ ერთ-ერთი აქტიური წარმომადგენელია, ხოლო შვილი კოალიციამ მაჟორიტარად წარადგინა.

ციხის თანამშრომლების მხრიდან პატიმრის წამების ამსახველი კადრები მოგვიანებით ტელეკომპანია „მაესტომ“ და „მე-9 არხმაც“ გაავრცელა. „მე-9 არხს“ აღნიშნული ვიდეოჩანაწერი გლდანის მე-8 დაწესებულების ყოფილმა თანამშრომლემა ვლადიმერ ბედუკაძემ მიაწოდა.

ამის გამო საპროტესტო აქციები სასჯელაღსრულების და შსს მინისტრის გადადგომის მოთხოვნით გვიან ღამით გლდანის მე-8 საპყრობილესთან, ასევე თბილისის ფილარმონიასთან გაიმართა. პატიმრების წამება საქართველოს სხვა ქალაქებშიც გააპროტესტეს. საპროტესტო აქციები დღეს თბილისსა და რეგიონებში ისევ განახლდება.

დღეს ცნობილი გახდა, რომ სასჯელაღსრულების მინისტრმა ხათუნა კალმახელიძემ გადადგომის მოთხოვნით პრემიერ-მინისტრს უკვე მიმართა. თანამდებობიდან გათავისუფლებულია სასჯელაღსრულების დეპარტამენტის თავმჯდომარე დავით ჭაკუაც.