ეროვნული უშიშროების საბჭოს მდივნის მოადგილე ბათუ ქუთელიას მიაჩნია, რომ ამერიკელი კონგრესმენების ღია წერილში საქართველოში ბოლოდროინდელი  რეფორმების შეფასებები მთავრობის წარმატებასა და ქვეყნის განვითარების სწორ გეზს კიდევ ერთხელ უსვამს ხაზს.

როგორც ბათუ ქუთელიამ აღნიშნა, ამერიკელი კონგრესმენები ქვეყანაში მიმდინარე წინასაარჩევნო სიტუაციას ზედმიწევნით გაეცნენ.

„მათ აღნიშნეს, რომ საქართველოში ძალზე მყარი საარჩევნო გარემოა შექმნილი. მნიშვნელოვანი ფაქტორია ისიც, რომ მათ ის პროგრესი აქვთ აღნიშნული, რასაც საქართველომ ბოლო პერიოდში მიაღწია“ - განაცხადა ქუთელიამ.

მისივე შეფასებით, კონგრესმენებისგან ასევე, მნიშველოვანია იმის ხაზგასმა, რომ არჩევნების შემდეგ არეულობების ხელშეწყობა დაუშვებელია. ქუთელიას განცხადებით, ამაზე პასუხისმგებლობა ყველა პოლიტიკურმა პარტიამ უნდა აიღოს.

საპარლამენტო არჩევნებამდე 2 კვირით ადრე ამერიკელი კონგრესმენები საქართველოსადმი მხარდასაჭერ ღია წერილს აქვეყნებენ.

ტექსტში აღნიშნულია, რომ მოახლოებული არჩევნები ქართული დემოკრატიისთვის ტესტი იქნება.

იქვე კონგრესმენები პოლიტიკოსებს მოუწოდებენ, რომ არჩევნების შედეგებს პატივი სცენ და უთანხმოება გვერდზე გადადონ.

წერილში აღნიშნულია, რომ საქართველომ და მისმა ლიდერებმა ნათელი და ცალსახა არჩევანი გააკეთეს, რომ ძირითად დემოკრატიულ ღირებულებებსა და იდეებს მხარი დაუჭირონ და პრაქტიკაში გამოსცადონ.