საქართველოს პრემიერ-მინისტრი ვანო მერაბიშვილი რაჭა-ლეჩხუმისა და ქვემო სვანეთის რეგიონში რამდენიმე სოფელს ესტუმრა.

პრემიერი ამბროლაურის რაიონის სოფელ ჭრებალოში გაზიფიცირების სამუშაოების შედეგებს გაეცნო. მერაბიშვილმა ხვარაძეების ოჯახში გაზქურა პირველმა აანთო და მათ მთავრობის მიერ დაგეგმილ კიდევ ერთ სიახლეზე მიაწოდა ინფორმაცია. მისი განცხადებით, სურვილის შემთხვევაში, ნებისმიერ მოქალაქეს ბუნებრივი აირის სახლში შეყვანის საფასურის დაფარვა 1000 ლარიანი ვაუჩერის მეშვეობითაც შეეძლება.

მოგვიანებით, პრემიერ-მინისტრი ამბროლაურის რაიონის სოფელ კვარცხუთში სეტყვისგან დაზიანებული ვენახების მეპატრონეებს და ადგილობრივი ღვინის ქარხნის წარმომადგენლებს შეხვდა. მისი განცხადებით, დაზარალებული მოსახლეობა უახლოეს დღეებში მიიღებს სასურსათო დახმარების პაკეტებს, ხოლო დაზიანებულ ყურძენს ადგილობრივი ღვინის ქარხნები ჩაიბარებენ. მინისტრმა ყურადღება გაამახვილა დაზიანებული ყურძნის მოსავლის დროულად დაბინავებაზე. ამ მიზნით, მერაბიშვილმა ადგილობრივ გამგეობას დაავალა, დაეხმარონ სტიქიისგან დაზარალებულ მევენახეებს მოსავლის აღებაში და ტრანსპორტირებაში.

გარდა ამისა, პრემიერ-მინისტრმა ამბროლაურის რაიონის სოფელ ბუგეულში „ალექსანდროულის“ ღვინის ქარხანაც დაათვალიერა და ქარხნის ხელმძღვანელობას ყურძნის დროულად მიღება-გადამუშავების დეტალებზე ესაუბრა.