საარჩევნო ბლოკი „ბიძინა ივანიშვილი-ქართული ოცნების“ ლიდერი ბიძინა ივანიშვილი აცხადებს, რომ სხვადასხვა საქველმოქმედო მიზნით მის მიერ გაღებული  თანხით ხელისუფლებაში მაღალ ხელფასებს ირიგებდნენ.

როგორც მან ახალციხეში, „ქართული ოცნების“ აქციაზე სიტყვით გამოსვლისას განაცხადა, 8 წლის წინ იმედი წარმოიშვა, რომ ქვეყანა ბევრ უკეთურობაზე იტყოდა უარს და პირველ წლებში ამის ნიშნებიც არსებობდა .

„შეძლებისდაგვარად ვედექი გვერდით ჩემს სამშობლოს და სახელმწიფოს ვეხმარებოდი. არასოდეს დამითვლია რამდენს ვიხდიდი ჩემი სამშობლოს დასახმარებალად, მაგრამ ახლა, როცა დამანგრეველობას მწამებენ, გეტყვით, რომ სხვადასხვა საქველმოქმედო მიზნით ჩემს მიერ გაღებული თანხით ხელისუფლებაში მაღალ-მაღალი ხელფასებიც რიგდებოდა, შენობებიც შენდებოდა და რემონტდებოდა“ - განაცხადა ივანიშვილმა და დასძინა, რომ ის პოლიციასა და ჯარსაც ეხმარებოდა.

მისივე თქმით, საბოლოოდ, პრეზიდენტმა მიხეილ სააკაშვილმა ისე დააძაბუნა ქვეყანა, რომ „გაჭირვებულ ადამიანს საბჭოეთი მოენატრა“.

„სწორედ ამიტომ არის სააკაშვილი თავისუფლებისა და ღირსების მოძულე. დავრწმუნდი იმაში, რომ ჩემი დახმარება სათავისოდ გამოიყენეს“ - აღნიშნა ივანიშვილმა და დასძინა, რომ თუ გინდა დახმარებამ შედეგი გამოიღოს, ადამიანს ფულით კი არა, ფულის კანონიერი გზით შოვნის საშუალების მიცემით უნდა დაეხმარო.

მისივე შეფასებით, სწორედ ასეთი დახმარების გასაწევად მოდის ხელისუფლებაში „ქართული ოცნება“.

ივანიშვილის თქმით, საამისოდ „ქართულ ოცნებას“ საერთაშორისო მხარდაჭერა, საკმარისი ცოდნა და გამოცდილება აქვს.