საარჩევნო ბლოკი „ბიძინა ივანიშვილი-ქართული ოცნების“ წინასაარჩევნო აქცია ახალციხეში მიმდინარეობს. მოსახლეობას სიტყვით ბლოკის ლიდერმა  ბიძინა ივანშვილმა მიმართა, რომელმაც ადგილობრივებს სამცხე-ჯავახეთის რეგიონის მაჟორიტარი დეპუტატობის კანდიდატები წარუდგინა.

მისი თქმით, არჩევნებს, ძირითადად მაჟორიტარები იგებენ და მოსახლეობამ გარდა იმისა, რომ კოალიციას უნდა დაუჭიროს მხარი, ასევე, კარგად უნდა გააცნობიეროს, ვინ არიან მათი რაიონების კანდიდატები.

ივანიშვილის განცხადებით, „ქართული ოცნების“ ბორჯომის მაჟორიტარი დეპუტატობის კანდიდატი იურისტი და სამართალმცოდნე გედევან ფოფხაძეა.

„ის ბორჯომელია და თავისი კუთხის პრობლემებს კარგად იცნობს. კარგად იცის მშობლიური ქალაქის გასაჭირი“ - განაცხადა ივანიშვილმა.

ასპინძის მაჟორიტარი დეპუტატის მანდატის მოსაპოვებლად თემურ მაისურაძე იბრძოლებს. ივანიშვილის თქმით, მაისურაძემ ზეინკალ-შემდუღებლიდან, საწარმოს დირექტორობამდე მიაღწია და კარგი გამოცდილება აქვს.

„ქართული ოცნების“ ნინოწმინდის მაჟორიტარი დეპუტატობის კანდიდატი ალბერტ ნურბეკიანია. ივანიშვილის შეფასებით, ნინოწმინდის მოსახლეობაზე ხელისუფლება ძალადობს, სადაც უმეტესად ეთნიკური უმცირესობის წარმომადგენლები ცხოვრობენ.

„ამდენ ხანს ოფისის დაქირავება ვერ მოვახერხეთ ნინოწმინდაში ისეთი ძალადობაა, მაგრამ ბოლოს ჩვენ ეს მაინც მოვახერხეთ, ოფისიც დავიქირავეთ და ძალიან კარგი კანდიდატიც შევარჩიეთ“ - აღნიშნა ივანიშვილმა და დასძინა, რომ ნინოწმინდაში ძირითადად, ხელისუფლების კანდიდატი იმარჯვებდა, მაგრამ ახლა სხვანაირი პრეცედენტი უნდა შეიქმნას.

მისი თქმით, ადიგენის მაჟორიტარი დეპუტატობის კანდიდატი ბიძინა გუჯაბიძეა, რომელიც პროფესიით იურისტია. ახალქალაქის მაჟორიტარი დეპუტატობის კანდიდატი კი - ნორიკ კარაპეტიანია.

„ახალქალაქშიც იგივე სიტუაცია იყო, როგორც ნინოწმინდაში, მაგრამ ეს ვითარება შეცვალა. შესაძლებელია, რომ ახალქალაქშიც ოპოზიციის წარმომადგენელმა გაიმარჯვოს“ - აღნიშნა ივანიშვილმა.

ახალციხის მაჟორიტარი დეპუტატობის კანდიდატი კი, ივანიშვილის განცხადებით, ისტორიის მეცნიერებათა კანდიდატი, პროფესორი გურამ კუტალაძეა.

ბიძინა ივანიშვილმა მოსახლეობას „ქართული ოცნების“ კანდიდატების მხარდაჭერისკენ მოუწოდა.