ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი თორნიკე გორდაძე არჩევნებისა და ევროინტეგრაციის  პროცესში არასამთავრობო ორგანიზაციების ჩართულობას მიესალმება.

როგორც გორდაძემ დღეს კონფერენციიდან -„საპარლამენტო არჩევნები და საქართველოს ევროკავშირთან ინტეგრაციის პერსპექტივები“ გამოსვლის შემდეგ ჟურნალისტებს განუცხადა, კონფერენციის განსახილველი თემები არჩევნები, ევროინტეგრაცია და აღნიშნულ პროცესებში სამოქალაქო საზოგადოების ჩართულობაა.

მისივე თქმით, კონფერენციაზე პირველი გამომსვლელი ევროკავშირის ელჩი საქართველოში ფილიპ დიმიტროვი იყო, რომელმაც განსაკუთრებული ხაზი საარჩევნო გარემოსა და საარჩევნო ბაზის დახვეწისთვის წინ გადადგმულ ნაბიჯებს გაუსვა.

„მან ასევე, განსაკუთრებით ხაზი გაუსვა ყველა მხარის პასუხისმგებლობას არჩევნების მშვიდად, დემოკრატიულად ჩატარებისთვის. არჩევნების შემდგომ პერიოდზეც პასუხისმგებლობა ასევე ყველამ უნდა აიღოს“ - განაცხადა თორნიკე გორდაძემ.

მისივე თქმით, თუკი საერთაშორისო ავტორიტეტული ორანიზაციები არჩევნებს აღიარებენ როგორც დემოკრატიული კრიტერიუმების შესაბამისს, ამ შემთხვევაში, ყველას პასუხისმგებლობა იქნება აღნიშნული გადაწყვეტილების პატივისცემა.

სასტუმრო „ქორთიარდ მარიოტში“ კონფერენცია -„საპარლამენტო არჩევნები და საქართველოს ევროკავშირთან ინტეგრაციის პერსპექტივები“ მიმდინარეობს.

კონფერენციას ხელისუფლების, პოლიტიკური პარტიების, დიპლომატიური კორპუსისა და საერთაშორისო ორგანიზაციების წარმომადგენლები ესწრებიან.