ევროკავშირის ელჩი საქართველოში ფილიპ დიმიტროვი მიიჩნევს, რომ საქართველოში წინასაარჩევნო გარემო ძალიან პოლარიზებულია.

ამის შესახებ მან „ნიუსპრესს“ სასტუმრო „ქორთიარდ მარიოტში“ კონფერენცია - „საპარლამენტო არჩევნები და საქართველოს ევროკავშირთან ინტეგრაციის პერსპექტივები“ დაწყებისას განუცხადა.

მისი თქმით, მსგავსი პოლარიზაცია დემოკრატიულ ქვეყნებში არ არსებობს.

„ეს საშიშია და მას ემოციებისკენ მივყავართ. ემოციები და ვნებები კი, დემოკრატიულ სტანდარტებს არ მიესადაგება“ - განაცხადა დიმიტროვმა.

მისი თქმით, საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენლმა ქეთრინ ეშტონმა და ევროკომისარმა შტეფან ფულემ აღნიშნეს, რომ არჩევნები რთული პროცესია, რომლის შედეგებით ყველა კმაყოფილი არ არის.

„ერთადერთი ინსტიტუტი, რომელსაც შეუძლია შედეგები გამოაქვეყნოს, ცესკო-ა. თუმცა, ცესკო-ს მიმართ საზოგადოებაში გარკევული ეჭვები და უნდობლობა არსებობს“ - აღნიშნა დიმიტროვმა.

როგორც დიმიტროვმა აღნიშნა, მნიშვნელოვანია, რომ ეს პოლარიზაცია არჩევნების დღეს და შემდეგ არ გაგრძელდეს.

„საქართველოსთვის ძალიან მნიშვნელოვანია, რომ არჩევნები თავისუფალ, სამართლიან გარემოში ჩატარადეს“ - განაცხადა მან. 

მისივე თქმით, არჩევნების სამართლიანად ჩატარების პროცესში პოლიტიკური პარტიებისა და მთავრობის წარმომადგენლებმა მნიშვნელოვანი წვლილი უნდა შეიტანონ.

დიმიტროვის განცხადებით, ასევე მნიშვნელოვანია, რომ საერთაშორისო დამკვირვებლებმა არჩევნების შედეგები შეაფასონ.

სასტუმრო „ქორთიარდ მარიოტში“ აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის კონფერენცია - „საპარლამენტო არჩევნები და საქართველოს ევროკავშირთან ინტეგრაციის პერსპექტივები“ მიმდინარეობს.

კონფერენციაზე სამოქალაქო საზოგადოების წარმომადგენლებთან ერთად, მომხსენებლების სტატუსით, ევროპული და ევროატლანტიკური ინტეგრაციის საკითხებში სახელმწიფო მინისტრი თორნიკე გორდაძე და ევროკავშირის ელჩი საქართველოში ფილიპ დიმიტროვი მონაწილეობენ.

კონფერენციას ხელისუფლების, პოლიტიკური პარტიების, დიპლომატიური კორპუსისა და საერთაშორისო ორგანიზაციების წარმომადგენლები ესწრებიან, რომლებიც არჩევნებთან დაკავშირებულ ძირითად საკითხებს და კონკრეტულ გამოწვევებს განიხილავენ.